Un dragón de sete metros e un «carro da lenda» protagonizarán o desfile do Samaín en Cambados
AROUSA
O Concello presentou onte un programa que arrincará coa chegada dunha Santa Compaña moi musical
19 oct 2024 . Actualizado a las 05:00 h.O concelleiro Tino Cordal presentou onte en Cambados o programa do Samaín, unha cita que dende o seu departamento se está reforzando con «máis actividades e eventos», motivo polo que levanta bastante expectación. O programa empeza a andar o mércores, 30 de novembro, cando chegará a Cambados a Santa Compaña. «Ao igual que en edicións anteriores, colabora con nós a escola municipal de música e o conservatorio elemental. A idea é que esta sexa unha Santa Compaña moi numerosa, poden ser ata duascentas persoas», explicaba Tino Cordal, que aproveitou a súa intervención ante os medios para agradecer a implicación de todos os axentes sociais que colaboran para que este e outros eventos sexan un éxito.
Xa o xoves 31, á tardiña, o programa do Samaín trasládase ao Parque de Torrado, onde se vai montar unha terrorífica festa. A zona das árbores converterase nun cemiterio, e o resto do parque encherase de espantosos elementos decorativos. Para poñer a nota musical, conta o Concello con DJ Terror. O día 1 de novembro, a troula suspéndese. Pero o día 2 volve con forza: na praza de Fefiñáns, a partir das cinco da tarde, Asacocirco despregará un espectáculo feito a medida para estes días nos que a porta entre o mundo dos vivos e dos mortos fica aberta.
O domingo chegará a que será «a actividade máis importante desta celebración do Samaín, que é o desfile terrorífico». Zancudos, patinadoras e todo tipo de seres monstruosos percorrerán as rúas da vila canda un dragón de sete metros e cor vermella que bota lume pola boca e un «carro da lenda». Para rematar, magosto en Fefiñáns.