O BNG advirte que a parálise do Concello do Grove agravaráse coa marcha do secretario
AROUSA
Critica o executivo de Cacabelos por, sostén, dedicarse á propaganda antes que a traballar polas prioridades do municipio
04 dic 2024 . Actualizado a las 05:00 h.O BNG do Grove amosouse estes días preocupado pola «parálise total do Concello», segundo explica o seu voceiro, Anselmo Noia, «e a demora inxustificada dunha ducia de obras», cuestión que achaca a unha «nefasta xestión» do rexedor socialista José Cacabelos. Situación que, sostén, agravaráse coa marcha do actual secretario municipal.
Os nacionalistas cualifican a situación de moi grave «pois o goberno do PSOE non está atendendo os problemas estruturais fundamentais para o municipio e só se dedica a realizar vídeos de propaganda e a intentar enmascarar a súa incompetencia con anuncios e actuacións pantalla de tipo populista, como o incremento de luces de Nadal», sinalan desde o BNG, advertindo que existe unha longa lista de deberes por facer, como o pintado e sinalización de rúas, asfaltados e un longo etcétera.
Noia considera que a saída do secretario prolongará a ralentización de expedientes e empeorará a situación: «O executivo debe traballar para cubrir a vacante en lugar de parchear a cuestión co préstamo do secretario por parte da Illa de Arousa, unha solución igual á que se usou no departamento de Urbanismo coa arquitecta que despacha tamén os asuntos un día á semana de prestado e grazas á xenerosidade do tenente alcalde e concelleiro do BNG da Illa, Manuel Suárez, que cogoberna nese Concello», din os nacionalistas mecos.