Galaxia e o Concello de Vilagarcía presentaron no Gato Negro de Carril unha selección de poesía co gallo do 75 aniversario da editorial
19 mar 2025 . Actualizado a las 20:54 h.Na mañá do martes 18 de marzo, o café O Gato Negro de Carril acolleu a presentación do libro As poetas da colección Salnés, unha escolma realizada por Patricia Arias Chachero. No acto participaron a propia autora, Sonia Outón, concelleira de Cultura do Concello de Vilagarcía de Arousa, e Xosé Manuel Soutullo, director xeral de Editorial Galaxia. Esta obra inaugura a colección especial polo 75 aniversario de Editorial Galaxia, un proxecto que pretende recuperar a memoria literaria galega dende unha perspectiva contemporánea. Xosé Soutullo destacou que este volume é o primeiro dunha serie de dez publicacións que conformarán a iniciativa.
Durante a súa intervención, Patricia Arias Chachero explicou a relevancia do proxecto tanto a nivel persoal como profesional. Como docente e integrante de Editorial Galaxia, subliñou a importancia histórica da editorial ao ofrecer espazo ás voces femininas no ámbito literario. Entre os textos incluídos na antoloxía, destacou un poema de María do Carme Kruckenberg, que, segundo indicou, sería o primeiro rexistrado en Galicia en abordar o amor entre dúas mulleres.
O libro recompila a obra de autoras que publicaron na colección Salnés de Editorial Galaxia dende a súa creación en 1961. Entre elas, atópanse María do Carme Kruckenberg, Pura Vázquez, María Manuela Couto Viana e Anne Marie Morris. Tamén se inclúe a Xohana Torres, quen, aínda que non chegou a publicar directamente nesta serie, foi a primeira muller en editar un libro con Editorial Galaxia e manifestou a súa intención de formar parte da colección. O contexto no que escribiron estas autoras resulta clave para comprender o impacto da súa obra, que desafiou os valores predominantes na sociedade da época. Sonia Outón, en representación do Concello de Vilagarcía de Arousa, sinalou a transcendencia do labor de Editorial Galaxia na conformación do panorama literario galego.