O Asmubal visita San Sebastián de los Reyes coa fase asegurada pero sen Eli, sen Paula e sen Sabela
AROUSA
O cadro meañés precisa a lo menos sumar un punto na súa carreira polo título
29 mar 2025 . Actualizado a las 05:00 h.O Inelsa Solar Asmubal Meaño está a tiro de tres puntos do que sería o seu primeiro título de Liga da División de Honor Plata Femenina, a terceira categoría do balonmán español. Tres puntos que debe conseguir nos seus dous últimos partidos. O primeiro deles, o que esta tarde, desde as sete, xoga na cancha do Alegra BM Sanse.
Enfronte, o cadro meañés ten un adversario da zona media da clasificación, sétimo con 24 puntos en 22 partidos, polos 39 que atesoura o equipo de Juan Manuel Costas. O precedente da primeira volta, un 33-21 o 7 de decembro, invitaría a pensar nun cómodo último desprazamento na fase regular da Liga de cara a dar o penúltimo paso na súa pelexa pechada co Balonmano Gijón polo título, toda vez que ambos os dous equipos certificaron matematicamente a semana pasada a súa presenza na vindeira fase de ascenso á DH Oro. O problema é que o Asmubal Meaño chega a este partido con demasiados problemas de efectivos. Eli Méndez e Paula Rey, mancadas, e Sabela Miniño, por traballo, non puideron viaxar, mentres que Laura Miniño o fai coa súa man de lanzamento tocada.