As proxeccións do cine club Ádega cambian de data aos xoves durante o mes de abril
AROUSA
A asociación programa «O home elefante» o día 10 coma homenaxe a David Lynch
02 abr 2025 . Actualizado a las 05:00 h.Certos problemas de dispoñibilidade do Salón García fan que ao longo deste mes de abril as proxeccións de Ádega muden de data. No canto dos mércores, a cita do cine club será os xoves ás oito e media do serán. Polo demais, os seus responsables informan de que a programación mensual dará continuidade á do 8M, cunha presenza especial de cine dirixido por mulleres, ademais de lle render unha homenaxe ao grande David Lynch.
Este mesmo xoves, 4 de abril, abre o ciclo o filme indio A luz que imaxinamos, escrito e dirixido por Payal Kapadia, que presenta as sombras e os soños de dúas mulleres nunha metrópole coma Mumbai. De balde para os socios e entrada reducida a 2,50 euros para o resto do público, por ser unha nova colaboración coa Filmoteca de Galicia.
O día 10 chega a quenda dun clásico, O home elefante, unha das obras mestras de Lynch, recentemente falecido, a quen Ádega quere lembrar merecidamente. Para concluír, o día 24 Salve María, un thriller psicolóxico coescrito e dirixido por Mar Coll. O cine club pon a disposición do público a súa canle en Telegram e o podcast O gafapasta plasta.