+DManá estrea esta noite unha xeira de concertos polos que pasarán tamén Mondra, Bustamante e Ainhoa Arteta
14 ago 2025 . Actualizado a las 05:00 h.A espera acabouse, hoxe é o comezo das Festas de San Roque en Vilagarcía. A extensa programación, que inclúe máis de medio centenar de actividades culturais, teatrais e musicais, daralle á cidade un atractivo engadido como destino ineludible. Tanto os locais como os visitantes poderán gozar da celebración que ten eventos para todas as idades, gustos e públicos.
A inauguración da festa patronal recae nas mans de Gustavo Andújar, quen será o encargado do pregón desta edición. O xogador de baloncesto, recoñecido como unha figura da historia deportiva de Vilagarcía, presentarase no balcón de Ravella ás 20.30 horas. Tras a lectura terá lugar a ofrenda floral a San Roque. Posteriormente, diversas agrupacións sociais, culturais e musicais participarán nun desfile dende o Concello e culminarán diante da igrexa parroquial. O percorrido sinalado atravesará os xardíns de Ravella continuando pola rúa Ramón y Cajal, praza de Galicia, Castelao, Xeneral Pardiñas, Covadonga e a praza de España. O primeiro día rematará, coa banda +DManá. O grupo musical será o primeiro en subirse ao escenario de San Roque que ten previsto a participación de moitos artistas. Nesta ocasión, a agrupación fará o seu tributo ás 22 horas na avenida da Mariña. O show promete ser unha viaxe no tempo, revivindo as melodías do grupo latino. O seu novo espectáculo ¿Dónde jugarán los niños? incluirá os clásicos Vivir sin aire, Corazón espinado, Clavado en un bar ou Rayando el Sol, entre outros. Como xa é tradición, a entrada é libre e de balde.
Pero queda moito máis por gozar. A música será un elemento indispensable que acompañará todos os días. Os pasarrúas con Intro Cover e Festicultores percorrerán os venres e Arousa Bay, o grupo de corda, voces e acordeóns, presentarase o sábado 16 ás 22.30 no Salón García.
O domingo será unha xornada dobre. Cristian Silva fará a súa actuación no auditorio ás 20 horas (entrada xeral 5 euros, pero dispoñen de descontos), a avenida da Mariña acollerá a Orquestra Saudade. Na seguinte semana soarán as grandes voces no parque da Xunqueira: o luns 18 ás 22 horas, Ainhoa Arteta. Dende o martes estréase o horario das 22.30 con Toreros Muertos; o mércores 19 David Bustamante; o xoves Marlena; o venres 22 actuará o galego Mondra, e a continuación, Señora DJ na Alameda. Por último, a noite do 22, o mesmo do Combate Naval, Grupo América subirase ao escenario; e o domingo 24 actuarán as Cantareiras Bulideiras na Alameda.