O conxunto vilagarcián amplía a sete o seu pleno de triunfos
24 nov 2025 . Actualizado a las 20:17 h.Sete partidos de Liga e sete vitorias. Os Ingleses RC vén de completar os dous primeiros meses da tempada encadeando o pasado sábado un novo triunfo. Desta volta, co CR Ferrol coma vítima: 32-8 no campo do estadio de atletismo de Fontecarmoa.
A actuación do conxunto visitante na primeira parte levou a crer que os homes de David Lema poderían ter serias dificultades para ampliar a súa espectacular xeira gañadora. O 10-3 ao descanso reflectía un partido moi pechado e incómodo para o cadro anfitrión.
O guión cambiou á volta do paso intermedio por vestiarios. Nos segundos 40 minutos de xogo, Os Ingleses despregou ese ritmo co que está impoñendo a súa lei na Primeira Galega Masculina de rugbi, materializando o seu rugbi combinativo nun parcial inapelable de 22-5. Álvaro Eire, autor de dous ensaios e unha transformación, liderou a anotación local (Brea, 2, Miguéns e Yago asinaron os catro ensaios vilagarciáns restantes do partido).
Os integrantes do conxunto que dirixe David Lema agradecéronlle á súa afección o apoio en masa na grada do estadio de atletismo de Fontecarmoa a pesar do pésimo tempo reinante o pasado sábado. Un respaldo que, confían, sexa inda maior este vindeiro sábado, no duelo que enfrontará, no mesmo escenario, Os Ingleses co terceiro clasificado, o Kaleido Universidade de Vigo, co CRAT coruñés agardando tamén con pleno de vitorias, só que cun encontro menos disputado.