Augas de Galicia actúa para eliminar dous puntos contaminantes en Cambados mentres o río Umia segue recibindo vertidos 

Martina Miser

A Consellería de Medio Ambiente e Cambio Climático dou conta hoxe dunha boa noticia desde o punto de vista do saneamento da ría de Arousa. «Augas de Galicia contribuíu a eliminar recentemente dous puntos de vertido de augas residuais no concello de Cambados. O persoal do Programa de Control de Vertidos (PCV) iniciou as actuacións no marco da campaña de inspeccións á rede fluvial da Demarcación Hidrográfica Galicia-Costa», informan a fontes oficiais.

Os vertidos corresponden a residuos procedentes de dúas vivendas situadas na desembocadura do río da Ucha en Corvillón que se eliminaron grazas á instalación dunha nova infraestrutura de saneamento municipal no lugar Aldea río da Ucha, á que se conectaron as dúas vivendas implicadas. Pero sempre hai unha de cal para outra de area.

Mentres Augas de Galicia saca peito por esta actuación, o río Umia segue recibindo un vertido na zona do Piorno (Oubiña) que desprende un cheiro nauseabundo. Neste lugar investíronse un millón de euros o pasado ano co fin de ampliar a capacidade da estación de bombeo, pero vese que non foi suficiente e uns meses despois os vertidos continúan sen que ninguén tome medidas para atallalos.

---

---

---