Cambados leva a educación sexual ás escolas e forma aos clubs sobre igualdade e condutas igualitarias

Continúan ao longo deste mes de maio os obradoiros de educación afectivo sexual nos centros educativos de Cambados dentro da programación da Concellería da Muller e Igualdade que dirixe Mar Pérez. Desta volta será o día 7 para o alumnado de primeiro, segundo, terceiro e cuarto de primaria de CEP Antonio Magariños, a petición do propio centro.

Estas sesións, impartidas pola oenegué Cromosomos X, perseguen os seguintes obxectivos adaptados a estas idades: entender a amplitude da sexualidade, proporcionar ferramentas para denunciar condutas sexuais non consentidas, traballar na imposición de límites corporais para a prevención do abuso sexual e comprender que o consentimento é a base para a vivencia libre e sa da sexualidade.

Este obradoiro súmase aos impartidos a semana pasada no IES Asorey para alumnado de segundo a ESO nos que se falou de desmontar os tabús que existen arredor da sexualidade e do consentimento.

Por outra banda, estase a organizar un curso de formación «Deporte e Igualdade: prevención e actuación fronte a condutas desigualitarias» destinado a xuntas directivas dos clubs, adestradores e todo a aquel persoal vinculado ás instalacións deportivas.

A duración será de catro horas que serán distribuídas en dúas sesións. A primeira celebrarase o vindeiro o 5 maio ás 20 horas na Casa da Calzada e a segunda o luns seguinte no mesmo horario e no mesmo lugar.

Segundo informa Mar Pérez, traballaranse contidos como a igualdade, equidade, diversidade, discriminación, acoso, abuso; as manifestacións de desigualdade de xénero no contexto deportivo (estereotipos, linguaxe, actitudes e prácticas normalizadas); identificación de situacións de risco, e protocolo básico de actuación ante situacións de discriminación e abuso.

---

---

---