As novas contratacións permiten abordar un  plan de limpeza en espazos públicos de Catoira 

O Concello de Catoira vai realizar un programa de limpeza das rúas, parques infantís, cunetas e instalacións para mellorar as infraestruturas e equipamentos do Concello nos vindeiros meses. A incorporación de oito persoas con contratos temporais á brigada de Obras e Servizos permitirá rozar a maleza de camiños e outros espazos municipais e reabrir o Museo do CACTO.

O alcalde, Xan Castaño, destaca que a xa se están poñendo ao día a limpeza das rúas do centro da vila, así como os parques infantís. Tamén se actuará realizando rozas en camiños, manual e con maquinaria e outras áreas municipais nas que é preciso retirar vexetación.

Por outra parte, o programa chegará tamén ás instalacións e edificios municipais que, aínda que xa dispoñen de contrato de limpeza, precisan unha intervención extraordinaria, segundo informa o Concello. É o caso, por exemplo, explica Castaño, das instalacións do CEMUMA e outros centros sociais, nos que diariamente hai actividades con persoas maiores, «polo queremos que estean en condicións óptimas».

Todos estes traballos realizaranse grazas a que o Concello dispón dunha subvención provincial de 93.227 euros ao abeiro da Liña 3 de activación do emprego 2025 do Plan +Provincia.

Por outra banda, Augas de Galicia comezou a executar onte actuacións de conservación e mantemento en máis de 3,1 quilómetros de varios regos, no concello de Catoira, en concreto nas Pozas e Gondomil ao seu paso pola parroquia de Santa Baia e nun tramo de algo máis de 1,2 quilómetros do río Catoira nas parroquias de San Pedro de Dimo e San Miguel. Os traballos consisten na retirada de árbores caídas e biomasa presente na canle fluvial para evitar atoamentos, así como na eliminación de especies exóticas invasoras, segundo informa a Xunta.

O prazo de execución é de seis semanas e os traballos realízanse de xeito manual.

---

---

---