Catoira ofrece dende o xoves asistencia xurídica a mulleres a través do Centro de Información á Muller
CATOIRA
O avogado poderá asesorar e orientar as mulleres sobre os seus dereitos e opcións legais en casos de violencia de xénero
20 ago 2025 . Actualizado a las 20:25 h.O Centro de Información á Muller (CIM) e o Concello de Catoira aliáronse para que o municipio conte cun servizo de asistencia xurídica a mulleres dende o xoves. Esta atención xa estaba incluída nos municipios de Valga, Pontecesures e Moraña, pero tras varios meses de trámites e da aprobación formal, Catoira tamén a ten.
Dende agora, as veciñas de Catoira disporán dun asesoramento xurídico e defensa de balde cando se enfronten a situacións de violencia de xénero ou se atopen en situación de vulnerabilidade. O avogado do Centro de Información á Muller (CIM) poderá asesorar e orientar as mulleres sobre os seus dereitos e opcións legais en casos de violencia de xénero, separacións, divorcios, custodia de menores, ou acoso, entre outros servizos. A maiores. o avogado do CIM tamén poderá asistir e representar ás mulleres en procesos xudiciais ou elaborar documentos legais como demandar, recursos ou contratos, así como negociar acordos extraxudiciais en conflitos familiares.
As interesadas neste servizo deben solicitar cita previa á traballadora social do Concello de Catoira, aínda que queda aberta a posibilidade da atención por urxencia en casos de especial necesidade. O avogado atenderá as usuarias un día por semana, inicialmente os xoves, entre as 8.30 e as 10.30 horas.
O Concello de Catoira tamén ofrecerá en breve asistencia psicolóxica especializada nas propias instalacións municipais, así como información e asesoramento en materia de igualdade, orientación e servizos de intervención social, todo de maneira estritamente confidencial.