O Concurso da Caña do País abre o prazo de inscrición para os destiladores valgueses

Con motivo da XXXV Festa da Anguía e Mostra da Caña do País, o Concello de Valga vai preparando todas as actividades e propostas que lle dan atractivo a esta celebración. Un ano máis, convócase aos destiladores artesanais empadroados en Valga a que participen no Concurso da Caña do País. Esta festividade, declarada de interese turístico de Galicia, levarase a cabo na última fin de semana do mes agosto.

O prazo de inscrición permanecerá aberto ata o martes 26 de agosto ás 14 horas. As categorías do certame, como xa é tradición, son tres: caña branca, tostada e de herbas. Os interesados teñen que seguir instrucións precisas para concursar. Con o obxectivo de manter a imparcialidade e o anonimato, os participantes deberán presentar as augardentes nun envase específico. Os mesmos serán provistos polo Concello e estarán a disposición da súa recollida nas oficinas. A maiores, os licores entregaranse debidamente embotellados e cun sobre pechado coa ficha de inscrición e datos persoais —enderezo e teléfono de contacto—.

As catas das augardentes terán lugar os días 28 e 29 de agosto nas instalacións do Centro de Interpretación da Caña do País e os gañadores daranse a coñecer o día 30 durante os actos da XXXV Festa da Anguía e Mostra da Caña do País.

Cun total de 1.100 euros de premios, o produtor da mellor caña branca recibirá 500 euros, mentres que os primeiros premios dos licores de herbas e tostado ascenderán a 300 euros. Finalmente, os segundos clasificados levarán un trofeo e un diploma conmemorativo.

O compromiso dos vencedores en cada unha das modalidades será a de entregar ao Concello o garrafón da augardente premiada.

---

---

---