O C.R. Mecos-Isabel, o C.R. Cuca Vilaxoán e o Amegrove C.R. volveron iniciar a Liga Galega con retos dispares. A tripulación de Fran González pretende repetir terceira, a vilagarciá quere ser o pescozo da LGT-A, e a mexilloeira, non sufrir
28 jun 2018 . Actualizado a las 05:00 h.A Liga Galega de Traíñas chegará este sábado ás augas da beira sur da ría de Arousa. Coa disputa (17.30) da Bandeira Virxe do Carme, organizada polo Club de Remo Mecos en colaboración co Concello do Grove. Será a terceira das 16 probas que este ano compoñen o calendario da LGT-A, a primeira das dúas divisións masculinas do barco rei do remo de banco fixo galego.
A tempada arrincaba o 16 de xuño coa Bandeira 525º. Aniversario da Arribada-Concello de Baiona. Sobre a base da peculiaridade desta primeira proba puntuable, con quendas de tres embarcacións, polas catro ordinarias, e despois da disputa o pasado sábado da Bandeira Baía de Mera, os primeiros resultados sitúan as tres traíñas do sur de Arousa na LGT-A, Mecos-Isabel, Cuca Vilaxoán e Amegrove, no rumbo correcto cara as coordenadas de destino ao termo do mes de agosto debuxadas nas cartas de navegación dos tres adestradores que ocupan os seus respectivos camarotes de capitáns.
C.R. Mecos-Isabel
Pegado ao ronsel de Samertolameu e Ares. Quinta en Baiona, e terceira en Mera. A traíña de Fran González chega á súa regata este sábado no porto do Grove no terceiro posto da clasificación provisional cos mesmos 18 puntos ca Mera, cuarto, e co barco de Bueu, mirando 6 puntos por debaixo a Samertolameu e a 4 o recén descendido da ACT Ares. Neste punto, e toda vez que o pasado sábado A Mequiña remataba a tan só 7,57 segundos do líder e a 4,93 de Ares, a Liga podería rematar hoxe mesmo con Fran González dando por boa a tempada. O grovense, que unha década despois regresaba no outono do 2016 ao club que levara á elite da elite do remo español, repite por segundo ano na dobre función de adestrador e de patrón de Mecos. Cun plantel que perdeu a tres dos seus titulares, Óscar Filgueira e Álvaro, no estribor, e o proel Dani Costas, ademais do seu patrón suplente, Félix, que marchou a Amegrove; pero que foi quen de manter o groso do seu bloque e de ampliar o seu fondo de armario, pasando de 16 remeiros no 2017 a 19 coa incorporación de sete reforzos, entre os que figura o local Kevin Costas. «Contamos cun plantel un pouquiño máis equilibrado, inda que cun potencial con pouca diferenza respecto ao do ano pasado», comenta Fran González. De aí que o seu obxectivo sexa repetir o terceiro posto da anterior Liga: «No 2017 estabamos a 25-30 segundos de Meira, que mantén o bloque e se reforzou, e que pelexará con Ares polo título. Buscaremos recurtar esa diferenza, e pelexar polo terceiro posto con Mera e con Bueu».
C.R. Cuca Vilaxoán
A continuidade como panca para subir un par de chanzos. Gelo Tarrío soubo manobrar o pasado outono ante a marcha dun terzo do seu plantel, compensando as saídas de Javier Cores, de Miguel Caeiro, de Joaquín Conde, de Víctor Pedrouzo, de Jacobo Suárez e da patroa Rebeca Ferreirós coas incorporacións de Brais Susavila (estribor 3), de David Soto (33 anos, procedente do Coruxo, estribor 4), de Aitor Cancela, patrón chegado do Coruxo e cun ano de experiencia con Tirán na ACT, máis a subida de catro xuvenís, Nicolás Cores, Gabriel Varela, David Ponte e José Rañó. Cunha tripulación cunha media de idade de 28 anos, e coa continuidade da traíña titular que rematara a LGT-A 2017 oitava na xeral, Gelo Tarrío confía no seu undécimo curso como remeiro e adestrador do Vilaxoán en dar un pequeno salto: «A idea é estar entre os seis primeiros, sen renunciar a nada». Tras dúas regatas, Vilaxoán é sexto con 13 puntos, cinco por debaixo de Bueu.
Amegrove C.R.
Aspirando a vivir tranquilo. O primeiro ano de Diego Cabaleiro á fronte da traíña de Amegrove saldouse no 2017 cun notable sexto posto, xusto na metade da clasificación. Na súa segunda campaña o tamén remeiro sitúa o obxectivo do seu barco en «non pasar apuros. Estar na quenda do medio sería un bo balance», di. E é que ao contrario cos seus veciños do sur da ría, Cabaleiro tivo que traballar arreo os nove últimos meses para reconstruír o seu barco. Con fichaxes de Vilaxoán, de Cesantes, do Grove e da propia canteira de Amegrove paliando a marcha de case a metade do seu plantel, con nove baixas, a maioría de remeiros titulares que aparcaron as traíñas e tamén da súa patroa, Estela Fieiro. E despois, co lastre do retraso na preparación por unha praga de lesións, que curiosamente afectou os máis novos nun plantel con moito veterán. Amegrove avanza oitavo na xeral.