Tras medirse esta tarde a domicilio co Choco xogará en modo Champions, o mércores no feudo do Arenteiro e o seguinte domingo fronte ao Pontellas. Na Senra, C.D. Ribadumia e Alondras voltan á competición logo de tres semanas
07 feb 2021 . Actualizado a las 05:00 h.O Arousa visita esta tarde o Campo de Santa Mariña de Redondela (17 horas) para xogar co C.D. Choco, no que é o primeiro dos tres partidos dun maratón ao máis puro ritmo de Liga de Campións. O equipo que dirixe Rafa Sáez deberá exprimir o seu rendemento para afrontar con éxito os encontros de Liga que aparecen marcados o mércores e os domingos dos oito días que contan a partir de hoxe. O efecto secundario de competir en plena terceira vagada dunha pandemia, que xa obrigou a como mínimo un confinamento domiciliario de 15 dos 24 conxuntos galegos que militan esta tempada na Terceira División. O Arousa é, ata hoxe, un dos 9 que zafou.
Logo de medirse hoxe ao Choco, o cadro de Rafa Sáez enfrontaráse o vindeiro mércores, día 10, a partir das 16.30 horas ao seu gran rival polo primeiro posto do Subgrupo B, o C.D. Arenteiro, en partido correspondente á duodécima xornada, a que se disputou o 10 de xaneiro. Cinco días máis tarde recibirá na Lomba o Pontellas, pechacancelas da Liga. Quedará inda despois por fixar o encontro que o cadro vilagarcián aprazou na decimoterceira xornada, o 17 de xaneiro, coa U.D. Ourense na Lomba por casos de contaxios por covid-19 nas filas do equipo visitante.
Polo que respecta á misión de hoxe, o Arousa recupera a Cobo, Campillo e Pedro García e viaxa coa dúbida de Javi Otero, cunha elongación nun aductor, para medirse a un rival quinto 4 puntos por debaixo e dous partidos máis xogados. Un Choco que fixo do seu campo sintético unha fortaleza esta tempada, con tres vitorias, catro empates e ningunha derrota, e o segundo e último equipo en vencer este curso o Arousa. Tras catro empates encadeados, os de Sáez procuran o seu primeiro triunfo en máis de dous meses.
Ribadumia e Alondras, na Senra
O C.D. Ribadumia disputa esta tarde na Senra (17 horas) o seu primeiro partido de Liga en tres semanas. Un parón forzado pola aparición dun contaxio por covid-19 entre o seu cadro de futbolistas que mantivo o equipo que dirixe Luis Carro en confinamento domiciliario dez días. Tras retomar os adestramentos o pasado luns e poder volver traballar o venres de novo con todos os seus efectivos, agás o lesionado de longa duración Fran Matos, o técnico vilanovés e os seus homes xogan hoxe a lo menos co factor igualador de medirse a un rival, o Alondras, que pasou por idéntica situación de parálise transitoria no mesmo período de tempo.
Luis Carro repetía na véspera do choque que por enriba do desgaste físico da inactividade grupal destas dúas semanas pasadas a maior erosión nas filas aurinegras vén do lado psicolóxico. Con todo, onte sinalaba que no vestiario da Senra «entendemos que nesta situación somos un privilexiados. Os futbolistas o que queren é adestrar e xogar. Pasar dez días confinados nas casas é algo que lle pode pasar a calquera en calquera outro sector de actividade», di o preparador vilanovés, mentres que, superada a corentena, os membros do C.D. Ribadumia poderán volver gozar do que máis lles gusta, xogar ao fútbol.
Así as cousas, o cadro ribadumiense encara o choque co Alondras «con ganas de volver. Con ganas tamén de volver á senda da vitoria», que se lle resiste desde que o 8 de decembro vencía a domicilio o Rápido de Bouzas, 0-2, e co agravante de encadear tres derrotas antes do seu parón. Claro que o Alondras non apuntaba mellores maneiras, con só 4 dos seus últimos 12 puntos disputados ingresados na súa conta de resultados.
«Moi compacto e difícil de facerlle gol, con moitísimos recursos para dominar o partido e moita xente de calidade no ataque». Así describía esquematicamente Luis Carro o seu rival desta tarde.
Noutra orde de cousas, o Ribadumia acordou co Atios data e hora para a disputa na Senra dun dos seus dous partidos aprazados pola súa corentena. Pasa da tarde do 24 de xaneiro á noite do mércores 17 de febreiro (20 horas).