Madrugón dos de Míchel Alonso para xogar ás 12, con José Rivera como novidade
15 sep 2024 . Actualizado a las 05:00 h.Unhas dúas horas e 20 minutos para cubrir os algo máis de 200 quilómetros que separan Vilagarcía de Viveiro. Xogadores e corpo técnico do Arousa péganse hoxe un bo madrugón para iniciar, ás 7.30 horas, a viaxe máis longa de cantas deberán cubrir nesta nova edición da Liga de Tercera RFEF. Madrugón obrigado para chegar en tempo e forma ao duelo que desde ás 12 medirá aos de Míchel Alonso co inquilino do campo de Cantarrana na segunda xornada do campionato.
Como ben recordou o adestrador arlequinado na véspera do enfrontamento, Viveiro e Arousa parten desde dous puntos diferentes no seu duelo. Porque mentres os de Míchel Alonso caían sete días atrás no seu propio feudo ante a Sarriana pola mínima, o seu primeiro anfitrión da temporada 2024-25 celebraba a vitoria ante o Atlético Arteixo, facendo bo o solitario tanto de Germán no minuto 54 de partido.
Sobre o papel, o Arousa parte como favorito á vitoria e, con ela, a sumar os que serían os seus 3 primeiros puntos da Liga. Unha empresa na que conta co plus de dispoñer de José Rivera, o seu punta de referencia, ausente ante a Sarriana por arrastrar un partido de sanción da fase de ascenso á Segunda RFEF a temporada pasada. Coa incorporación do dianteiro vilagarcián, Míchel Alonso conta co seu cadro de xogadores ao completo, á espera da chegada a mediados da vindeira semana de Duque tras completar a súa experiencia no fútbol de Australia.