Din que a esperanza é o último que se perde, pero é inevitable que os pais do Pilar Maestú pensen que a loita pola xornada única será moito máis difícil do que parece. Este non é o primeiro intento para conseguila, e mesmo o director, Vicente Vázquez, quere ser cauto: «Non queremos facernos moitas ilusións porque o ano pasado a resposta foi negativa». Asegura que no caso anterior a iniciativa fracasou ao incrementarse os pagos á empresa que se encarga do transporte: «Ao parecer había un apuntamento no convenio no que se especifica que, en caso de levarse a cabo algún cambio, debería facerse un pago do 20 % do total a modo de compensación».
Propoñen agora un horario novo de dez menos cuarto da mañá ata case as tres da tarde, o que implicaría modificacións do servizo. Os pais e profesores que apoian a xornada continua confían en que non só se pense no custo, senón no interese xeral. «Hai que ter en conta que coa nova proposta os autobuses aforrarían viaxes porque na actualidade teñen que vir dúas tardes. Este non é o horario que máis nos gusta, pero xa rexeitamos outro por medo a que non nolo aceptasen», engade Vázquez.
Consciente dos problemas que moitas familias teñen para conciliar, Vicente Vázquez cre que a nova xornada proposta sería de grande axuda, por iso estima que o 80 % dos proxenitores estarían interesados. Se a Consellería de Educación dá luz verde, os pais poderán votar.