Esta nova novela de Antón Riveiro somérxenos directamente no horror da guerra, que aniquila poboacións enteiras e destrúe por completo cidades, soños e proxectos. Neste caso é a guerra de Siria, focalizada na cidade de Alepo dividida en dúas partes enfrontadas.
A voz do narrador achégase aos sufridores dos dous bandos para escoitar os seus lamentos. As voces das vítimas fanse así presentes. A loita, o exilio ou o compromiso solidario compoñen o mosaico de solucións desesperadas onde o prezo a pagar resulta sempre moi alto.
Na liña doutras novelas do autor de Laura no deserto, cunha coidada linguaxe onde amosa o seu dominio do adxectivo e a metáfora, a historia engancha dende o seu inicio e conduce o lector á traxedia dos refuxiados ante unha Europa hostil de fronteiras pechadas e de valos interpostos. Pero tamén a esperanza está presente, tal como sinala a contraportada do libro, pois este Paraíso dos inocentes é tamén «un canto emocionado á solidariedade, á esperanza e á liberdade».
«O paraíso dos inocentes»
Antón Riveiro Coello
Galaxia (2020)
132 páxinas