A finca do pazo de Goiáns volve abrir as súas portas para festexar o Día das Letras Galegas
BARBANZA
Na Pobra haberá unha lectura de poemas de Xela Arias
17 may 2021 . Actualizado a las 05:00 h.Despois de moito tempo sen actividades e máis dun ano de reformas, a finca do pazo de Goiáns volveu onte a abrir a súas portas para que veciños e visitantes puidesen descubrir todos os cambios que se fixeron neste histórico conxunto arquitectónico. As visitas guiadas, que continuarán hoxe, enmárcanse dentro do programa de actos do 17 de maio, posto que hoxe está previsto retomar nestes terreos a tradicional Romaría das Letras, que impulsa o Concello coa colaboración da asociación Barbantia.
Será ás 17.00 horas e Sonia Lebedynsky fará de mestra de cerimonias dun acto no que actuarán os grupos Aroña, Xilbarbeira e Os Melidaos, e no que se presentará unha biografía de Xela Arias e o libro Nus de Manuel Gago. Todas as invitacións para sumarse a este acto esgotáronse en menos de 24 horas.
Poemas en A Pobra
En A Pobra haberá programación especial con motivo das Letras Galegas, que comezará ás 12.00 horas, cunha lectura de poemas de Xela Arias no Cantón da Leña e unha ruada con grupos de música tradicional. Pola tarde, ás 19.00, proxectarase no cine Elma Lúa vermella de Lois Patiño.
No municipio muradán as actividades terán como escenario a praza do Mercado, onde o grupo Odaiko presentará a obra Mar adiante, a partir das 18.00 horas; mentres que en Noia os actos culturais serán na Alameda. Alí haberá unha actuación de danza (12.30), unha intervención dramatizada a cargo de Serafín Marcos sobre Xela Arias, e unha ofrenda floral diante dos bustos de Antón Avilés e María Mariño e que estará amenizada polo grupo Salgueiriños.
Na Aula de Música de Aguiño, Rilo & Penadique presentarán o espectáculo musical Contos na punta da lingua (19.00), na praza do Concello de Ribeira actuará Raquel Queizás (12.00) e o grupo O Rueiro percorrerá as rúas.
Un dos últimos actos do día terá lugar en Outes, onde se coñecerá o gañador do certame de poesía Francisco Añón. A cita será na casa da cultura, a partir das 17.00 horas.