OPINIÓN | «Ten moita razón un amigo con cartos que non ten tarxetas nin móbil, é un home libre. Pódese mover sen rastro ningún»
07 nov 2023 . Actualizado a las 05:00 h.Tiña a sospeita e comprobeino nun centro comercial —non é lugar ao que vaia, non me sinto a gusto— ó tentar picar algo nun deses establecementos que frecuentan os nosos mozos —que tampouco vou nunca—, e que se espallan polo noso territorio con atractivas marcas comerciais —atractivas para as novas xeracións—.
Nada máis entrar neses inhóspitos «restaurantes» non encontras camareiro ningún, e máis que cliente pasas a ser un número, un simple número que che darán nun papel de 30 centímetros de longo, irrespectuoso coas árbores.
Observo que todos os mozos que entran diríxense a unhas atractivas pantallas táctiles nas que van escollendo cada parte do menú, deixando nelas o suor dos seus dedos, que pasará a outros dedos. Hixiene, a xusta.
Unha vez tés o pedido feito e pagado —por adiantado— pasas a unha fila como a do médico, banco ou supermercado. Deixas se ser ti para representarche un número, que sae na pantalla, recolles o teu pedido e fas de camareiro da barra á mesa. Logo de consumir, fas de camareiro da mesa ao lixo. Por certo, todo o menú cheo de cartóns, papeis. Outra vez máis lixo contra o planeta.
O máis «curioso» é que non podes pagar con cartos, só con tarxeta bancaria, algo que queren os bancos e os políticos para controlar todos os nosos movementos: onde estamos, cantos somos, canto gastamos, que tipo de consumo facemos, como somos. Para saber todo de nós, facernos máis borregos e perder a nosa liberdade de movernos sen que nos rastreen. Ten moita razón un amigo con cartos que non ten tarxetas nin móbil, é un home libre. Pódese mover sen rastro ningún.