Cando Melide loitaba por impoñerse a Mellid houbo quen se alporizou de máis por ese costume que temos os galegos de non mudar nada, que se resume na frase «toda a vida foi Mellid», ou calquera outra nomenclatura que se cuestione.
Un documento do ano 1213, atopado hai uns anos polo director do Museo da Terra de Melide, constata que a vila xa figura como Melide. Deste xeito fican aclaradas as dúbidas sobre o nome histórico, o topónimo orixinal, que quedou traducido a Mellid pola teima castelanizadora e deturpadora do século pasado (cf. Sanjenjo ou Rianjo).
Deixando as etimoloxías populares, como a da arenga dun xeneral que berrou «Mil ide» ou a do presunto nome dun dirixente islámico: Abdalá ben Melik, parece máis verosímil unha orixe no antropónimo latino Mellitus, que xa está documentado no século XI na fórmula *(villa) Melliti «a vila de Mellitus», un señor tardorromano ou medieval, que debe o seu nome á palabra mellitus «doce como o mel», procedente do nome do único adozante durante séculos, e que tivo tanta importancia como alimento e como remedio para os nosos entregos.