Óscar Prego: «A vila sinte o Liceo como algo propio e é un orgullo ter unha entidade así»
NOIA
A sociedade ten previsto incluír un par de actuacións e tamén unha presentación dun libro nas festas
24 ago 2025 . Actualizado a las 05:00 h.Liceo de Noia é unha entidade dinamizadora da vida social e cultura da vila. E o é desde o ano 1928, polo que está xa moi preto de converterse nunha sociedade centenaria. Á fronte da directiva actual está Óscar Prego como presidente, que leva xa uns cuantos anos no cargo e que vendo tan cerca esa data sinalada, valora se volver presentarse ás eleccións que se terán que celebrar no próximo mes de xaneiro.
—Contan cunha programación específica no San Bartolomeu?
—Por experiencia doutros anos, consideramos que non ten sentido duplicar actividades. Teremos un par de actuacións e a presentación dun libro. A vila xa ten un programa festivo. Aínda así algo facemos para que o Liceo participe. Solemos colaborar co Concello nestes días nas alboradas cos grupos de música tradicional ou coa Misela, que se creou no Liceo. Temos unha relación fluída co Concello porque temos que estar na vida diaria dos veciños de Noia e da comarca. A colaboración sempre é beneficiosa para ambas partes e non pechamos a porta a novas ideas.
—Actividades xa fan dabondo o resto do ano.
—Acabamos de lanzar as actividades do curso que vén e son mínimo unha vintena, que van desde algunhas máis culturais, como música e debuxo, a outras deportivas, como bádminton, tenis, ximnasio ou ioga. Logo, ademais, sempre temos presentacións literarias, actuacións musicais, eventos puntuais como o de Nadal e outros propios, como o festival de bandas de música, as xornadas de banda deseñada ou a revista Alameda, na que contamos con articulistas de renome. Tamén dispoñemos dunha sala de exposición de pintura e arte, que é a envexa de moitos e á que cada mes ou mes e medio veñen artistas a mostrar os seus traballos.
—Está claro que o Liceo é parte de Noia.
—A vila sinte o Liceo como algo propio e é un orgullo ter unha entidade así. A xente que vén de fóra di que son un luxo as nosas instalacións, incluso artistas contrastados que veñen aquí. Estamos orgullosos do que se fai día a día e quero agradecerllo aos compañeiros da directiva e ás nosas familias.
—Con cantos socios conta a entidade?
—Somos preto de 2.600 socios e logo hai que sumar os beneficiarios, que non son socios pero si usuarios. O Liceo mantese única e exclusivamente coas cotas dos abonados, que non son altas. Hai que facer números para cadrar as contas. A directiva intenta xestionar do mellor xeito posible. Consideramos que a liña de traballo é aceptable, aínda que sempre hai que mellorar. Na última asemblea propuxemos unha reforma estatutaria que consideramos necesarias e aprobouse.
O
Prego valora presentarse á reelección en xaneiro. FOTo Cedida