A Casa Real aposta por Ribeira con be

A institución usaba o topónimo deturpado pero rectificou tras unha queixa da Mesa pola Normalización


Ribeira / La Voz

Se a máxima institución do Estado sentara cátedra, o dilema sobre se o topónimo de Ribeira se escribe con be ou con uve estaría resolto. A Casa Real sitúase no bando da be, aínda que precisou da intervención da Mesa pola Normalización Lingüística para facelo porque ata non hai moito non empregaba a forma que recolle a Toponimia Oficial de Galicia, senón a que defende o Concello.

Foi unha queixa trasladada por un cidadán na que apuntaba que a web da Casa Real utilizaba varios topónimos deturpados, entre eles Riveira, a que puxo en marcha a maquinaria monárquica e provocou a rectificación para substituír a uve.

Este é un dos logros recollidos pola Mesa no seu informe sobre a Liña do Galego, un servizo no que recompila as denuncias da cidadanía por discriminacións e vulneracións de dereitos no uso da lingua de Rosalía, unha relación de queixas na que, no que respecta ao territorio barbancés, a deturpación do topónimo ribeirense está un ano máis á cabeza. Con todo, non é o único caso que se produce na comarca, e Arosa, Puebla, Noya o Juno son algunhas das excepcionais formas empregadas por diversas empresas para aludir ás distintas localidades e á propia ría arousá.

En total, no conxunto de Barbanza rexistráronse o ano pasado unha trintena de queixas relativas ao mal uso -ou a ausencia de uso- do galego tanto por parte das Administracións como de empresas particulares. Os casos rexistrados na zona supoñen o 10 % do total de Galicia, onde se recolleron 303 denuncias. Neste sentido, destaca o feito de que a maioría teñen como protagonistas as institucións públicas, un feito que para a Mesa pola Normalización resulta preocupante. «É alarmante que quen ten obriga de garantir o respecto dos dereitos lingüísticos da cidadanía encabece a lista de queixas, sendo non só cómplice destas actitudes senón promotora directa», sentenciaba Marcos Maceira, presidente da entidade.

Máis incumprimentos

No caso barbancés, aparte dos concellos, son o Sergas e a Axencia de Doazón de Órganos e Sangue as institucións que acumulan máis incumprimentos, segundo o informe da Liña do Galego, principalmente polo uso deturpado do topónimo Ribeira. Pero á Mesa pola Normalización Lingüística chegaron tamén queixas porque determinados formularios e carteis do hospital comarcal só aparecen en castelán ou por un cartaz dun acto dirixido ao persoal do centro, que tampouco estaba en galego.

Pola súa banda, a Axencia Galega de Infraestruturas denomina Pedrás ao río Pedras nos letreiros de sinalización da autovía de Barbanza, e a Policía Nacional tampouco se libra dunha denuncia porque a renovación do DNI só se pode facer en castelán.

En canto ás Administracións locais, o Concello de Ribeira tamén foi obxecto de crítica por empregar carteis de aviso unicamente na lingua de Cervantes ou ben mesturando galego e castelán, mentres que se dirixiu unha queixa ao de A Pobra por parte dun veciño que denunciou que non foi posible que o atenderan en galego no rexistro municipal.

Ata catro idiomas

Outro caso curioso é o de Carnota, que na súa oficina de turismo dispuña dunha enquisa ata en catro idiomas, pero ningún deles era o galego.

Outras institucións públicas que aparecen mencionadas no informe son a mancomunidade Arousa Norte, a Federación Galega de Fútbol (polo uso de Riveira na súa web) e Turismo de Galicia. Porén, a Liña do Galego non recolle unicamente queixas, tamén inclúe parabéns para empresas e institucións que aposten polo uso do galego. Neste apartado, aparecen diversas firmas con sede en Barbanza, coma un negocio de peixería rianxeiro ou restaurantes de Carnota e Outes que teñen a rotulación e sinalización e prestan atención na lingua autóctona ou aseguradoras que facilitan a documentación para as pólizas neste idioma.

A campaña En Rianxo ao noso xeito tamén merece unha mención pola promoción da linga na paisaxe comercial do municipio a través de material coma bolsas.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
10 votos
Comentarios

A Casa Real aposta por Ribeira con be