Levamos co tema do tren que nunca chegou á Costa da Morte máis de cen anos. Sen abusar de expresións que tan ben acaerían para o caso, ese tren xa pasou. Unha mágoa, porque esta comarca podía ser outra ben diferente e mellor. Aínda que quen sabe! En certas zonas de Castela polas que ás veces paso os restos das vías son agora iso, restos. Pero o normal é que o transporte ferroviario de persoas e mercadorías axude ao desenvolvemento, non hai máis que ver algunhas áreas de Galicia, España e sobre todo Europa.
E se se aposta de novo por el? Aproveitando que se está construíndo a conexión con Punta Langosteira, o nexo con esta comarca quedaría moito máis preto. Polo menos nun eixo inicial cara A Laracha e Carballo. Xa sei que estas cousas non se fan dun ano para outro, que se necesitan moitos fondos e moitos estudos. ¡Se ata para ampliar unha granxa de vacas a burocracia é moita e os prazos lentos! Pero se cadra o momento de chuzar vén agora. O eixe entre Bértoa e Arteixo vai ter un potencial extraordinario co que hai e co que virá. Polígonos fortes, cheos de empresas, algunhas delas punteiras e con mercados internacionais. Un tren podería garantir conexións rápidas, eficaces e limpas, e máis no mundo eléctrico que está por vir neste século. E xeraría unha sinerxias que xa nos podemos imaxinar. Sobre este arco industrial falaron esta semana na presentación da ampliación do polígono da Laracha, que entre o público e o privado sumará dous millóns de metros a medio prazo. Non ten pinta de ser polígonos dos que crían herba da Pampa ou xestas. A ver se hai de verdade opcións reais e o que falta é unha aposta seria.