O eclipse de 2026 na Costa da Morte, que será tal día coma hoxe

De hoxe nun ano España sufrirá unha espectacular febre astronómica. Será o punto ideal no mundo para a observación da eclipse total de Sol que terá lugar o 12 de agosto de 2026. Prodúcese porque a Lúa se interpón entre nós e o Sol. O tamaño aparente dos discos de ambos astros é moi parecido, o cal fai máis aparatosa a carambola cósmica.

Vai ser só un instante, pero lembren a tolemia que houbo o ano pasado nos EE.UU. para observar o que pasou por amplas zonas do seu territorio, e que foi contemplado directamente por uns 50 millóns de persoas.

Por que esa fascinación? Porque é impactante ver o día transformado en noite de golpe e, sobre todo, porque somos conscientes de que é unha experiencia que só se produce unha vez na vida. As eclipses de Sol son relativamente frecuentes, levamos xa 15 totais e 18 anulares no século XXI (a anular ocorre cando a Lúa está afastada dabondo como para que o seu disco se vexa máis pequeno, de xeito que non dá tapado o Sol totalmente), pero é moi difícil que nos pase de lado da casa. Fíxense: a última vez que se viu unha en Galicia foi en 1912, e a seguinte despois do de 2026 non volverá a ocorrer ata o ano 2180. Polo medio haberá un anular en 2082.

A franxa para observalo terá uns 400 quilómetros de ancho, pero curiosamente a fronteira sur desa franxa pasa xusto pola Costa da Morte, partíndoa diagonalmente en dous polos concellos de Zas e Cabana de Bergantiños. Así, a zona norte do noso territorio será a que experimente a escuridade total, pero mellor canto máis ao norte. Se estamos moi cerca da fronteira da eclipse, verémola pouco tempo. Na Carballa (Cabana) ou Budián (Zas) durará só 1 segundo, en Ponteceso 13 segundos, en Coristanco 33, en Carballo 45, en Malpica 49 e na Laracha 54 segundos. Dentro do destino Starlight da Costa da Morte o concello da Laracha será o mellor lugar e, dentro del, Caión: alí a totalidade da eclipse durará un minuto e dous segundos.

---

---

---