O colexio Celso Emilio Ferreiro de Cerceda gaña o certame autonómico das Letras Galegas
CERCEDA
Venceu na categoría de infantil e primaria coa súa exposición «Cantareiras: poesía popular oral»
06 may 2025 . Actualizado a las 05:00 h.A Xunta deu a coñecer os centros educativos que resultaron vencedores no concurso do Día das Letras Galegas 2025, que se lle dedican este ano ás cantareiras e á poesía popular. Desta banda, os galardóns recaeron no colexio Celso Emilio Ferreiro de Cerceda, na categoría de infantil e primaria, e no instituto Castelao de Vigo, que logrou o distintivo na sección de secundaria.
O proxecto dos cercedenses levou por título Cantareiras: poesía popular oral, e o xurado fixo fincapé no seu carácter integrador e inclusivo, «co emprego de técnicas e recursos diversos, entre os que se atopan códigos QR ou pictogramas», apuntan dende a Xunta nun comunicado. A mostra, que se acompañou dunha guía didáctica, recibirá como gratificación un premio económico de 2.000 euros.
Con esta convocatoria, o Goberno galego buscou impulsar a achega da mocidade a esta manifestación da cultura popular, instando aos rapaces a afondar na importancia dos cantos e da tradición oral para a lingua galega ao longo da historia, así como no labor fundamental das mulleres como transmisoras desa riqueza.