Manuel Insua, PSOE de Corcubión: «Os servizos públicos son prioritarios»

Electricista de profesión, Manuel Insua Insua (1959) repetirá como candidato á alcaldía de Corcubión polo PSOE para tratar de conseguir o seu terceiro mandato, logo de dous períodos de goberno en minoría. Servizos públicos, casco histórico e inversións: as súas prioridades.

—Que balance fai deste mandato que está a piques de rematar?

—Aínda que a algúns dos outros candidatos de Corcubión lles pareza que poño a pandemia como escusa, as persoas que tivemos que gobernar nesa etapa sabemos as dificultades que pasamos. Foi un período de indecisións, imprecisións, incertidumes e mesmo medo. E as Administracións pequenas sufrímolo en maior medida. Aínda así, fomos capaces de sacar adiante case tódalas obras que tiñamos pendentes (máis dun millón e medio de euros de inversión) e os servizos sociais funcionaron á perfección.

—A nivel político, estes catro anos comezaron cun acordo, pero remataron co PSOE gobernando en solitario.

—Ao principio do mandato chegamos a un acordo con Ramón Rojo, de Pacor, para reforzar a investidura, pero aos poucos meses creo que lle faltou lealdade. Era unha presión constante, mesmo con ameazas de moción de censura, e un goberno non pode ter un socio que o ameaza tódolos días, así que decidimos apartalo e seguir en minoría. Estamos acostumados a gobernar así, con dificultades e tirando de moita man esquerda, aínda que hai que dicir que neste mandato sobre todo o BNG participou en decisións importantes. Aínda así, foi lamentable que o Bloque se opuxese á dedicación.

—Cales son as principais necesidades de Corcubión?

—Para nós, o prioritario son os servizos públicos. Somos o único concello da zona que ten o SAF público, completamente con persoal municipal, e sen lista de agarda. Tamén continuaremos coa liña de traballo do casco histórico e temos un proxecto moi interesante para a Praza de Castelao para o cal estamos solicitando fondos europeos. Será un proxecto humanizado, con moito espazo aberto e dende o cárcere vello.

—E tamén está aí o centro de día.

—Si. Nós temos claro que queremos que sexa público, pero para iso a Xunta ten que asumir as súas competencias. A conselleira nin nos recibe, e o consorcio o que nos di é que creemos Casas do Maior.

—Algunha outra proposta no programa electoral do PSOE?

—Moitas cousas, pero algunha das básicas é que estamos en negociacións coa Deputación para crear un espazo coworking no pobo, do que se poderían beneficiar pequenos autónomos, e tamén para humanizar, facer máis segura e continuar ata o río de Quenxe a senda de Corcubión. Tamén hai que continuar coa conservación do casco histórico, que é a nosa xoia da coroa.

---

---

---