A parroquia fisterrá de Sardiñeiro vivirá desde o venres ata o domingo as súas festas na honra do Sagrado Corazón de Xesús. Ana María Díaz, do lugar de Castrexe, e os veciños Juan Manuel Blanco, Yolanda Lires e Pedro Santiago Díaz cumprirán o seu oitavo ano á fronte da organización dunha celebración que levaba máis de vinte anos sen facerse ata que colleron o temón.
-Recuperando o bo...
-Iso é o que nos propuxemos os catro, e aquí seguimos. Cando comezamos levábase sen facer 23 anos. Era unha mágoa perder algo así, polo que tratamos de recuperala.
-E xa moita con experiencia ao lombo.
-Si, e moito traballo, pero facémolo con moito gusto.
-Os veciños non se queixarán con tantos días de festa...
-Antes celebrábase tan só o domingo, pero nós sempre quixemos que durase máis. Estamos moi contentos de que sexa así.
-Organizan churrascada, sardiñada, queimada...
-Así todo o mundo ten para escoller. Ademais, economicamente axúdanos moito.
-¿Quedan ata moi tarde?
-Ata as seis ou sete da mañá nunca recollemos. Os rapaces e a xente de mediana idade aguantan cada vez máis o ritmo. Pero se durase ata as nove, seguiríamos sen problema.
-Tamén gozaredes vós.
-Si, turnámonos para bailar.
-¿E respéctanse as quendas ou hai quen se esquece?
-(Ri) Facemos todos á quenda, non nos despistamos.