David Gómez Brandariz, PP de Zas: «O Concello estase quedando atrás con respecto a outros»

David Gómez Brandariz (Baio, 1974), é biólogo, responsable da entidade Río Mar e candidato do PP de Zas por terceiro mandato consecutivo.

—E esta vez, con catro candidaturas en liza, tamén co PSOE. Que lle parece?

—É unha boa nova que o PSOE concorra a estas eleccións. Levaban tres mandatos sen facelo, e o abano de posibilidades ábrese, os veciños teñen máis opcións de voto, e optarán por aqueles que máis lle convenzan. A min paréceme moi ben.

—Vostede xa é veterano.

—Si, é a terceira vez que dou o paso co PP. E coas mesmas ilusións. Creo que temos unha candidatura de xente moi preparada e moi nova, que lle dá ánimos a un. E levamos un programa electoral moi real e moi concreto. Somos unha boa alternativa ao goberno de Muíño.

—Como valora estes últimos catro anos de goberno?

—Foi un mandato atípico, pasou a pandemia, no foi doado para ninguén, tampouco para o goberno. Dende o PP tratamos de facer unha oposición o máis leal posible, sen buscar moito o conflito nin nada parecido. Sempre lle tendemos a man por se necesitaban calquera cousa. Dito isto, foi un mandato no que non se fixeron grandes cousas. O Concello estase quedando algo atrás con respecto a outros da contorna e limítrofes. Tras 16 anos de goberno, hai un desgaste evidente. A ilusión non é a mesma. Nós ofrecémonos a vertebrar este cambio se os veciños así o estiman. Somo a alternativa máis viable, e así traballaremos.

—O obxectivo é gañar.

—Por suposto. O que me coñece sabe que non me embarco nun proxecto se non é para gañar, e imos intentalo. O rival non é doado, pero temos unha candidatura moi atractiva, un programa moi obxectivo, e con iso trataremos de convencer aos veciños de que somos a mellor opción.

—Que se pode destacar do seu programa electoral?

—A grandes rasgos, levamos un programa moi obxectivo e concreto. Hai grandes proxectos. Levamos unha piscina municipal climatizada e cuberta en Zas. Non todos os concellos a teñen. Os servizos sociais van ser tamén fundamentais. Intentaremos que o abano de servizos sexa máis amplo. A lista de espera no SAF debe de ser cero, con atención inmediata. No medio ambiente temos cousas importantes, como a creación dun punto limpo. E na cultura, o mesmo. Levamos cousas que fan falta, como fomentar o emprego, e lembrar que somos un municipio agrario. Hai que pensar na súa xente, no arranxo das pistas forestais, facilitarlle o traballo. E que Zas sexa atractivo para que a xente veña para aquí. O municipio está perdendo poboación, e hai que tratar de evitalo. As comunicacións son boas, temos aí unha autovía e unha autoestrada que nos permiten estar na Coruña, e hai que ver a Zas atractivo para vivir e traballar.

---

---

---