O humorista presenta esta tarde na RAG o seu ensaio, publicado na colección Cadernos Ramón Piñeiro
16 mar 2017 . Actualizado a las 05:00 h.Se alguén sabe de humor nesta terra é Siro López. E non só polo seu papel como veterano humorista gráfico que ten transformado a actualidade galega en sorrisos durante décadas, senón tamén como estudoso do tema. Tanto é así, que xa de novo recibira o encargo de Celestino Fernández de la Vega de facer un libro sobre a presenza do humorismo no Quixote. E, como é un home de palabra, o fixo. O resultado é Cervantes e o Quixote. A invención do humorismo, volume que presenta esta tarde, ás 19.30 horas, na sede da Real Academia Galega.
Neste libro publicado dentro da colección Cadernos Ramón Piñeiro, que destaca entre os infinitos textos dedicados á obra cervantina polo orixinal punto de partida da súa análise, Siro afonda nese uso pioneiro do humorismo, xénero que non pretende arrincar unha gargallada como a comicidade nin utiliza a ninguén para facer rir, como a sátira, senón que é unha nova forma de humor que «se dirixe a un mesmo tempo á intelixencia e ao sentimento», afirma o autor. É dicir, que fai máis sorrir que rir e que esperta certa complicidade intelixente por parte do lector.
E o autor apunta a Cervantes e ao seu Quixote como punto de orixe de ese humorismo que, por outra banda, asegura Siro que ven a confirmar as orixes galegas do de Alcalá de Henares: «Cervantes era galego polos seus antergos, e utiliza a retranca varias veces. Íalle na xenética, porque a retranca só de dá en Galicia», ten afirmado López.