De «Mimosas» a «O que arde», Oliver Laxe reflexiona este martes na Coruña sobre a súa traxectoria creativa

Este martes 25 de febreiro dará comezo o ciclo Artistas Galegos. O autor e a súa obra, unha actividade enmarcada nos Martes das Artes, na que os creadores galegos explican en primeira persoa o seu proceso creativo, as súas motivacións e a evolución da súa traxectoria artística.

O primeiro acto do ciclo contará coa presenza do actor e director de cine Oliver Laxe, quen reflexionará sobre a súa traxectoria e experiencia no mundo cinematográfico. Todas as sesións celebraranse ás 20.00 horas no salón de actos da Real Academia Galega de Belas Artes (Praza Pintor Álvarez de Sotomayor, 1, A Coruña) e terán entrada libre ata completar aforo.

Oliver Laxe: unha traxectoria de éxito internacional

A carreira de Laxe foi recoñecida no Festival Internacional de Cine de Cannes, onde obtivo o premio Fipresci no 2010 con Todos vós sodes capitáns, o Gran Premio da Semana da Crítica no 2016 con Mimosas, e o Premio do Xurado na sección Un Certain Regard no 2019 con O que arde.

Fillo de pais galegos, Laxe medrou en Galicia tras regresar coa súa familia desde Francia en 1988. Estudou na Coruña antes de trasladarse a Barcelona, onde se graduou en Comunicación Audiovisual na Universidade Pompeu Fabra.

Iniciou a súa filmografía en Londres coa produción de curtametraxes antes de trasladarse a Tánxer, onde dirixiu a súa primeira longametraxe, Todos vós sodes capitáns, baseada na súa experiencia no obradoiro cinematográfico Dao Byed para nenos desfavorecidos. O seu éxito continuou con Mimosas no 2016 e O que arde no 2019, sendo esta última a primeira película en galego en ser seleccionada nunha sección oficial do Festival de Cannes.

O ciclo Artistas Galegos. O autor e a súa obra brindará ao público a oportunidade de coñecer de preto a traxectoria de Laxe e doutros artistas galegos, promovendo o diálogo entre creadores e espectadores nun espazo dedicado á difusión da arte e da cultura.

---

---

---