As cantareiras foron homenaxeadas coa entrega dunhas placas conmemorativas
17 may 2025 . Actualizado a las 05:00 h.Na véspera do Día das Letras Galegas, A Coruña viviu unha xornada marcada pola emoción, a música e o orgullo pola tradición galega. O acto institucional, presidido pola alcaldesa, Inés Rey, na praza de María Pita, rendeu homenaxe a sete mulleres cantareiras que contribuíron á cultura galega a través da música tradicional: Adolfina Casás, Rosa Casás, Eva Castiñeira, Manuela Lema, Teresa García, Prudencia Garrido e Asunción Garrido. As lembranzas das súas familias e a música das pandeireteiras de Donaire fixeron da lingua e a memoria as grandes protagonistas do evento. A alcaldesa anunciou ademais a colocación de tres placas conmemorativas en puntos emblemáticos da cidade como recoñecemento ao seu legado. O himno de Galicia, interpretado por Álex Ruíz coa súa gaita, puxo o broche a un acto cargado de significado.
A celebración estendeuse ao ámbito literario coa entrega do VII Premio de Poesía Eduardo Pondal a Clara Martín pola súa obra Asfixia, unha peza contemporánea que honra a palabra escrita. Tamén a Universidade da Coruña participou con actividades como un encontro co escritor Manuel Rivas no Espazo Normal e a presentación de iniciativas culturais, entre elas a colocación de novas placas toponímicas e concertos homenaxe.
A exposición «Tesoureiras do noso» foi inaugurada na Biblioteca de Galicia, ofrecendo un percorrido pola tradición oral e musical galega. Pola súa banda, a Xunta e Vegalsa-Eroski impulsaron unha campaña nos 150 supermercados galegos para celebrar o Día das Letras mediante carteis, bolsas, imáns e marcapáxinas, subliñando o compromiso coa lingua e cultura propias.
A festa tamén se viviu nas rúas: na praza do Humor, o espectáculo Máis saaabor! de Culturactiva animou a xornada, xunto a un pasarrúas con Espadana e cabezudos que percorreu desde a praza de Lugo ata a de José Sellier. En San Andrés, Galeatro representou Muiñada, e xa pola noite, o Teatro Colón acolleu o concerto de Treixadura. A xornada previa rematou nos Xardíns de Méndez Núñez cun gran serán ao aire libre, no que participaron agrupacións emblemáticas da música tradicional galega como Cántigas da Terra, Aturuxo, Xacarandaina, Donaire, Maghúa, Son d’Aquí, Espadana e Contiños da Feira.
Sábado 17 de maio (Día das Letras Galegas)
- 11.00 horas | Galgo Azul — Vermut Corufest 2025: presentación do libro O cento voando con Ánxela Lema e concerto de Sophie Simonds
- 12.30 | Praza de Azcárraga — Dúo Cro-Cró con Pava
- 12.30 | Praza do Humor — Lydia Botana presenta A feira das linguas
- 13.00 | Praza José Sellier — Pulpiño Viascón con Dallecopé
- 17.30 | Xardíns de Méndez Núñez — A.C. Son d’Aquí e A.C. Xacarandaina
- 18.00 | Praza do Humor — Contos a pé de rúa con Caxoto
- 19.30 | Praza de San Andrés — Artefacto producións presenta Dúo Vaguedades (Isabel Risco e Fran Rei)
- 21.00 | Campo da Leña — Concertos de Zavala, Atalaias de Caión, Ulex e Ortiga