O xuízo ao lobishome de Allariz e un plano de 5 metros do río Ulla, xoias do Arquivo do Reino de Galicia no seu 250.º aniversario
A CORUÑA
A institución coruñesa conmemora a súa fundación por Carlos III en 1775 cunha exposición de 61 documentos inaugurada este mércores polo conselleiro de Cultura
22 oct 2025 . Actualizado a las 15:21 h.O Arquivo do Reino de Galicia presentou este mércores unha exposición conmemorativa do 250.º aniversario da súa fundación na Coruña o 22 de outubro de 1775 por Carlos III, «un rei moi adiantado para todos os que nos dedicamos á cultura, que se deixou convencer para fundar o que entón se denominou o Arquivo Público e Xeral de Galicia», apuntou a directora, Carmen Prieto, na inauguración da mostra.
A montaxe fai un percorrido histórico a través de 61 documentos e 16 obxectos que comprenden desde expedientes xudiciais e textos públicos, como os vencellados a Facenda, ao Goberno civil ou á Real Audiencia de Galicia —entre eles, a causa contra o lobishome de Allariz, Manuel Blanco Romasanta—, ata tombos de mosteiros, como o de Santa María de Sobrado de 1592, ou un espectacular plano do río Ulla de 5 metros de longo debuxado no ano 1800, que apareceu dobrado no interior dun legaxo e foi restaurado no laboratorio do Arquivo.
Ata o 30 de xaneiro de 2026, «o público poderá achegarse aos fondos a través dunha escolma de pezas coas que descubriremos escritos de grande interese e que agochan curiosidades que nos fan comprender acontecementos de épocas pasadas», sinalou na inauguración José López Campos, conselleiro de Cultura da Xunta, a Administración que xestiona o centro. Son unha representación dos algo máis de 550 fondos que custodia completada con fotografías estereoscópicas en visor, imaxes audiovisuais e outros documentos reproducidos nunha liña do tempo.