É unha xilografía realizada polo artista en 1964 e que estaba en mans dun empregado da fábrica Celtia
01 abr 2025 . Actualizado a las 13:32 h.O Concello de Sada, a través da Asociación Cultural Irmáns Suárez Picallo, recibiu este martes unha copia numerada dunha obra inédita ata o día de hoxe de Isaac Díaz Pardo. A obra é do autor a quen se lle adica este ano o Día das Artes Galegas e trátase dunha xilografía que Díaz Pardo levou a cabo no ano 1964 durante unha das súas estancias na cidade de Buenos Aires e que estivo custodiada durante todos estes anos pola familia de Luis Carlos Ángel, Pocholo, Sánchez, empregado da fábrica Celtia e as Porcelanas de Magdalena.
O Concello de Sada agradece esta doación e anuncia que exhibirá o seu exemplar na Casa da Cultura Pintor Lloréns en canto estea debidamente enmarcado e protexido.
A obra estaba en mans de Federico Sánchez, sobriño de Pocholo, que a conservou sen coñecer nin a súa finalidade gráfica nin detalles sobre a súa autoría, pero si recordando que o seu tío dixéralle que era valioso.
A raíz dun proxecto de 2020 sobre a historia local sobre a fábrica Celtia foi cando lembrou esta peza e atopou a dedicatoria no dorso escrita por Isaac Díaz Pardo para o seu empregado e socio no proxecto.
Colectiva Magdalena 318 identificou o taco xilográfico e decidiu a realización dunta tirada limitada de dez copias numeradas e compartir estampas coa familia do artistas e institucións aos dous lados do Atlántico.
Colectiva Magdalena 318, formada por José Luis Meirás, Agustina Constanza Crespo e Luiciana Belén Barrios, leva adiante un proxecto de rexistro audiovisual no que colabora a asociación Suárez Picallo.