«Meu Courel imaxinario»
Aurichu Pereira. Centro Cultural da Deputación de Ourense. Ata o 6 de marzo.
As obras desta exposición, de distintos formatos e técnicas, non son unicamente o froito dun traballo recente, senón que existe un pouso que se foi acumulando ao longo de décadas vinculado coa arte e a cultura en xeral, e que dalgunha forma moldeou, paso a paso, a traxectoria artística de Aurichu Pereira. Cada unha destas propostas foi celosa e concienzudamente madurada no silencio do obradoiro; todas e cada unha nacen cargadas de vivencias cotiás, de fardos literarios e musicais, de pensamentos soltos e valiosas experiencias, que máis tarde ou máis cedo acabaron por agromar sobre a tea, o papel ou o cartón.
O motivo semella claro no propio título desta cita, porque o que a autora pretende representar, imaxinariamente, é a alteridade dunha paisaxe, que acaba tendo presenza física como recurso alegórico a través dunha cadencia abstracta, máis intensa en cor e densidade de materia nalgunhas zonas e máis suave, refinada e con menos arrastres noutras.
O tema do que parte Aurichu Pereira, aínda que abordado desde un territorio natural próximo, non deixa de ter un viveiro espiritual, un impulso interior que é invocado aquí por un informalismo que se contén, volvéndose lacónico para non perder a referencia do suposto real e facer da obra un significante sen significado. Por iso nestas imaxes é posible contemplar lugares e sentir sons, albiscar o ceo cando se reviste de néboa matinal, a auga da montaña baixando dende o berce, a potencia da luz facéndose un oco... Nesta glosa paisaxística habitan emotivas nostalxias que moven a creación.