Chus Pato entrou no paraninfo do IES Otrero Pedrayo escoltada por outras dúas mulleres
24 sep 2017 . Actualizado a las 05:00 h.Chus Pato entrou no paraninfo do IES Otrero Pedrayo escoltada por outras dúas mulleres: Fina Casalderrey e Marilar Aleixandre. O momento, segundo as propias verbas do presidente da RAG, «foi histórico». Nunca antes sucedera algo similar.
A poeta ourensá explicou ao rematar o acto que volver ao centro no que se formou foi especialmente emotivo. «Para min, a única cidade real do mundo é Ourense. E fíxome moitísima ilusión estar aquí porque foi onde fixemos o ingreso. Cando entramos tiñamos nove anos e entrabamos pola porta mortos de medo porque aquí arriba examinábannos», lembrou facendo referencia ao estrado dende o que onte realizou o seu discurso. «Esta vez non tiven medo, porque xa estaba preparada pero sentín moita emoción», engadiu.
Chus Pato licenciouse en Xeografía e Historia pola Universidade de Santiago de Compostela e traballa no ensino desde 1995 -actualmente en Lalín, cidade na que reside-. Durante todos estes anos compaxinou a docencia coa escritura de poesía, que xa lle viña de nova.
No acto de ingreso estiveron presentes Valentín García Gómez, secretario xeral de Política Lingüística; Antón Sánchez García e Ánxeles Cuña Bóveda, deputados de En Marea, así como representantes doutras formacións políticas. Non obstante, o eido das letras e a cultura foi o que máis acudiu a presenciar a súa entrada na Real Academia Galega. Virxilio Rodríguez, vicerreitor do campus de Ourense da Universidade de Vigo; Antón Vidal, presidente da Editorial Galaxia, ou Carlos Lema, da mesma editorial -amigo de Pato e que repasa algúns dos poemas da recente nomeada académica antes de seren publicados- foron algúns deles.