O Museo do Pobo Galego acolle o proxecto participativo a nivel internacional
14 abr 2023 . Actualizado a las 22:59 h.Unha tea de dez centímetros por dez centímetros e nela unha reflexión sobre o lugar, sobre a contorna, como é a identificación co territorio e o sentido de pertenza. Esta é a base sobre a que se articula Cartografías téxtiles, a mostra-instalación participativa que abriu este martes as súas portas no Museo do Pobo Galego. Nela recóllense xa ducias de olladas, combinando as máis simbólicas con outras reivindicativas, chegadas non só desde distintos ámbitos de Galicia, sobre todo desde o eido educativo e asociativo, senón tamén desde outros puntos do mundo, desde Canadá a Sudáfrica pasando por Portugal e Bélxica. Pero a reflexión non se detén aquí. Todos os que acudan poden facer a súa interpretación do territorio. Á entrada da sala expositiva agardan anacos de tea e numerosos elementos para plasmar a ollada propia e incorporala a este proxecto expositivo.
Cartografías téxtiles é unha iniciativa internacional organizada polo grupo de investigación da Asociación de Profesores de Expresión e Comunicación Visual de Portugal (Apecv), que pretende dar voz ás comunidades e aos lugares a través das técnicas téxtiles para configurar un mosaico a través do que facer un chamamento polo futuro do planeta. «É unha iniciativa que supuxo traballar en rede e facer un chamamento sobre o desenvolvemento sostible a través da arte e a través do téxtil. Escóllese o téxtil porque supón darlle visibilidade ao patrimonio que se foi transmitindo de xeración en xeración e tamén a todas esas mulleres que fixeron do seu traballo un espazo de resistencia. Ademais, implica reflexionar sobre o noso lugar, cal é a relación que temos coa nosa contorna, como se configura e, dalgunha maneira, soñar con outras formas de vivir», asegurou Cristina Trigo, coordinadora do proxecto en Galicia xunto a María Jesús Agra.
E a resposta a ese chamamento a cavilar sobre o lema Dálle voz ao lugar foi «abraiante». Con entidades que se sumaron para deixar olladas moi diversas con bordados, calcetando, cosendo... A mirada sobria sobre o patio do colexio da rapazada do CEIP Apóstolo Santiago, articulada a través de noces, castañas e follas... comparte lenzo coas coloristas composicións dos compañeiros do CEIP da Ramallosa (Teo). O gran mosaico que conformou o alumnado do IES Rosalía de Castro de Santiago sobre a zona antiga convive co redeseño de prendas a partir da reciclaxe do IES García Barros da Estrada, a ollada crítica ante a presenza de plásticos, pneumáticos e a deforestación do obradoiro de manualidades do Hospital Psiquiátrico de Conxo (Santiago) ou a visión desde a fiestra proposta por estudantes da USC. Resalta tamén o simbolismo das creacións de alumnado do grado de mestre da Universidade de Valencia, que reflicten con fíos as ondas sonoras resultado de ler obxectivos vinculados á sostibilidade. Non faltan tampouco as olladas desde colectivos como Agadea, Down Compostela, Aspanaes... Entre todas estas diversas historias sobre o lugar «créase unha cartografía inmensa para falar de quen somos», conclúe Cristina Trigo. O director do Museo do Pobo, Manuel Vilar, incidiu en que é unha exposición que acae nas súas salas porque «non só temos que amosar elementos fóra de uso, senón tamén traballar coa sociedade actual».
Unha mostra que medrará ata finais de mes e logo viaxará a outros lugares
O proxecto «Cartografías téxtiles» iniciou a súa andaina no 2021 e foi percorrendo distintos países da man de artistas, educadores de arte e activistas sociais que desenvolven accións e exposicións participativas, como a que ata final de mes permanecerá nas salas do Museo do Pobo. As primeiras paradas foron en Portugal (Viseu e Faial), pero tamén chegou xa a Springfield (Estados Unidos) e a Australia, entre outros puntos. Agora, tras a estadía en Santiago, está previsto que se leven a cabo proxectos similares en Brasil e Namibia. Deste xeito, os traballos que faga o público que acuda ao Museo do Pobo non só se incorporarán aos paneis das salas, senón que tamén serán enviados a outros lugares.