Por cuestións puramente casuais achegueime a un dos primeiros censos de poboación feitos en España seguindo técnicas estatísticas modernas e datado no ano 1787. Naquel tempo reinaba o borbón Carlos III e a realidade administrativa e demográfica española eran ben diferentes á que temos na actualidade con todo o que iso significa. O devandito censo foi elaborado por José Moñino y Redondo, conde de Floridablanca e persoeiro que ostentou importantes cargos políticos entre 1777 e 1792, de aí lle vén o nome ao documento. Nel recollíanse as diferentes provincias co número de cidades, vilas, lugares ou aldeas de cada unha delas e tamén o número de habitantes solteiros, casados e viuvos segundo o xénero, entre moitos outros datos, algúns deles ben curiosos. A división territorial do Estado español era significativamente diferente á actual. Daquela o noso país denominábase Reino de Galicia e estaba dividido en sete provincias con 3.683 parroquias que coincidían practicamente coas actuais pero coa diferenza salientábel de que daquela esas parroquias estaban cheas de xente. E tanto era así que o denominado Reino de Galicia, segundo este censo, era o que máis habitantes tiña de todas esas divisións.
A provincia da Coruña era a máis poboada de toda España e a de Pontevedra a que maior densidade tiña, ocupando o quinto lugar en número de habitantes. Lugo e Ourense situábanse nos postos sexto e décimo desa mesma clasificación. Cómpre non confundir o número de habitantes da provincia co das cidades que son cousas ben distintas. Polo tanto aquel Reino de Galicia de 1787, e segundo o censo de Floridablanca, tiña arredor do 10 % da poboación daquela España mentres que hoxe apenas chegamos ao 6 %. Esta información dá que pensar a respecto de como evolucionou a poboación e sobre todo da importante perda sufrida por Galicia en contraste coa suba doutros lugares. Tamén dá para facer diferentes análises que axudarían a entender a situación actual directamente vencellada á masiva emigración que comezou no século XIX, a forte caída da natalidade e o conseguinte despoboamento do medio rural en contraste cos tempos no que se fixo o censo nos que gozaba dunha saúde ben distinta.