![](https://img.lavdg.com/sc/LCF9VK5BlVkDiCXIQ83t-a61o7I=/480x/2024/04/23/00121713902703347873140/Foto/H_20240423_202347000.jpg)
![](https://img.lavdg.com/sc/fiFSUK6wFj4BV3UHFsCjWNwfr7c=/480x/2024/04/23/00121713902702466956204/Foto/H_20240423_202521000.jpg)
![](https://img.lavdg.com/sc/Cz2-st57vaVo4-IHfa15oTJO-mk=/480x/2024/04/23/00121713902761916243496/Foto/H_20240423_202257000.jpg)
![](https://img.lavdg.com/sc/ussu5hbWhBq_NGeKgaEXvBB1dFs=/480x/2024/04/23/00121713902642244322340/Foto/H_20240423_202709000.jpg)
![](https://img.lavdg.com/sc/OCMzoxWsYOTL1Y0L7y-bMXZ6czM=/480x/2024/04/23/00121713902702208227544/Foto/H_20240423_202540000.jpg)
![](https://img.lavdg.com/sc/O5OERY_AASTrStNDk39gR3nCQ_Q=/480x/2024/04/23/00121713902643023497531/Foto/H_20240423_202600000.jpg)
![](https://img.lavdg.com/sc/slOlQBwQWICJbIszS6g3I6-XrwA=/480x/2024/04/23/00121713902642774366723/Foto/H_20240423_202621000.jpg)
![](https://img.lavdg.com/sc/bL7YYsp5T5Ue0HQ86v-nA7FcVDc=/480x/2024/04/23/00121713902641722327378/Foto/H_20240423_202807000.jpg)
![](https://img.lavdg.com/sc/zSse9N9LA0ZhFKNZOPRnBU72pQ4=/480x/2024/04/23/00121713902762211363836/Foto/H_20240423_202214000.jpg)
![](https://img.lavdg.com/sc/tInxAbEmHYK_nW2Ux0OlTJZreyc=/480x/2024/04/23/00121713902642523395270/Foto/H_20240423_202638000.jpg)
![](https://img.lavdg.com/sc/BzVbj1fIJCKPPzrKvxASKNS18bI=/480x/2024/04/23/00121713902703592458814/Foto/H_20240423_202329000.jpg)
![](https://img.lavdg.com/sc/5VSeDCP8hWxtxfzPgeLkuQVzMHA=/480x/2024/04/23/00121713902703033921215/Foto/H_20240423_202407000.jpg)
![](https://img.lavdg.com/sc/D2vPSrTCz0ofyZQwuFx9EmyL7dc=/480x/2024/04/23/00121713902702708853177/Foto/H_20240423_202427000.jpg)
![](https://img.lavdg.com/sc/0FgVApowiMrr3kzXpdWBGwYysRc=/480x/2024/04/23/00121713902641999101263/Foto/H_20240423_202743000.jpg)
Case cen obras amosan o selo único do pintor nunha mostra na Coruña
24 abr 2024 . Actualizado a las 05:00 h.Da muralla de Lugo ao monte Louro. Do Empire State Building de Estados Unidos á súa máis que recoñecida silueta da cidade herculina. Adentrarse no universo de Jorge Peteiro (A Coruña, 1959-Sada, 2013) é viaxar a un mundo de fantasía, cor e vangarda. «Atopámonos ante unha exposición onde se pode apreciar ese estilo tan persoal que o levou a museos, coleccións, prestixiosas institucións, fundacións e, sobre todo, centos de casas», sostivo Pedro Vasco Conde, comisario xunto con Beatriz García Trillo, artista e viúva do pintor e escultor, da mostra Peteiro.
A selección de 94 pezas foi inaugurada este martes a tarde no Kiosco Alfonso polos dous comisarios e pola alcaldesa da Coruña, Inés Rey. «Peteiro foi e será referente na vangarda galega, mais tamén un coruñés profundamente identificado coa súa cidade, sendo fonte de inspiración que retratou ao longo das súas obras», resaltou a rexedora.
As obras reunidas nesta exposición son esenciais para entrar no coñecemento do seu pensamento e sentimento artístico. A través delas, a persoa que visite o recinto poderá facer un percorrido pola súa etapa máis recoñecible. «Grazas, Beatriz, por exercer esa bonita pero difícil tarefa de revivir momentos e recordos con quen, ademais de compartir unha vida persoal, compartiches proxectos, arte e profesión», sinalou Rey.
«Fun e son a compañeira de Jorge», comezou García Trillo ao inicio da súa intervención. «Nada lle gustaría máis que vervos aquí. Esta exposición é un deleite dos sentidos, onde Jorge foi creando o seu mundo. Con cor en cada pincelada. Tamén dicía que non hai lugar con máis matices que Galicia», foi avanzando Beatriz. «El cría na maxia, cría nela porque a tiña. Xa desde os seus primeiros traballos notábase o seu sentido do humor e a súa fantasía, o seu sentido lúdico da vida», engade no discurso que forma parte do catálogo oficial da mostra.
Un referente na arte galega
«As paisaxes son a parte máis importante da súa produción e unha fonte de inspiración e motivación en si mesma. Servíronlle para reinterpretar a súa contorna e para traducir o que ve cos seus códigos, símbolos e signos», explicou Vasco Conde. A alcaldesa, pola súa banda, lembrouno como un artista libre que soubo impoñerse no mercado da arte sen deixar o seu exercicio artístico. «Compartía o seu lado máis bohemio con artistas coetáneos coma Xaime Cabanas ou Correa Corredoira, que xunto co seu talento levaron A Coruña a posicionarse como referente da arte de vangarda en Galicia», afirmou Rey.
O percorrido polo seu legado artístico é unha oportunidade única para apreciar a relevancia deste pintor contemporáneo. «A esencia das súas obras e o seu impacto visual radican na luz e na cor. A súa paleta está graduada e expresada na súa máxima potencia expresiva. A luz e a cor son tratados como planos complementarios que se fusionan para desenvolver unha atmosfera que mestura a luz mediterránea e a galega ou atlántica», reflexiona o comisario sobre a importancia deste artista. A mostra pode visitarse de forma gratuíta ata o vindeiro 21 de xullo. «Estamos ante un artista que marchou demasiado cedo, pero pese a todo deixounos algo tan coruñés como era a que el chamaba “alegría de vivir”» explicou a alcaldesa, e convidou a toda a cidade a visitar a exposición, especialmente ás novas xeracións.
En total, a mostra contou coa colaboración de 21 institucións públicas, entidades privadas ou persoas individuais. Destacan a Deputación da Coruña, o Muncyt a través do Ministerio de Ciencia, Innovación y Universidades e Abanca, xunto co Concello da Coruña. Tamén a familia e amizades de Jorge Peteiro. «Hai que facer unha mención especial a Fina, súa nai, a que sempre lle dou pulo para seguir», expresou Beatriz nos agradecementos.