Martín Códax abre ao público a votación dos premios da música en Galicia

«Unha gran celebración da selva diversa e espectacular da música galega contemporánea». Deste xeito definiu Xurxo Souto os Premios Martín Códax da Música. O motor dos Diplomáticos, que exercerá como presentador da gala que o 15 de maio dará a coñecer os gañadores da súa undécima edición, acostuma a ter puntería cando fala. Desta volta, foron máis de catrocentas as candidaturas que presentaron as súas credenciais para se facer cunha das 19 categorías entre as que se distribúen os galardóns e cada ano miden a temperatura da música que flúe dende Galicia. Entre elas, o xurado profesional vén de escoller a 57 finalistas, que onte se reuniron nas bodegas de Cambados nunha festa que salienta o carácter non competitivo dunha iniciativa que ben merece a etiqueta de Grammy galaicos.

O carácter colaborativo da convocatoria musical sobe enteiros este ano coa decisión da organización —integrada pola asociación Músicas ao Vivo, co patrocinio de Martín Códax— de abrir a elección dos gañadores ao público en xeral. De feito, o traballo do xurado xa rematou. A xornalista Pilar G. Rego, a violinista Elena Vázquez, o guitarra Alberto Busto, a baixista Maritxhinha e Cao de Mos, responsable da sala Rebullón, fixeron a súa parte, debullando as candidaturas ata chegar a estes 57 aspirantes finais.

A partir de hoxe mesmo, e ata o 12 de maio, quen queira tomar parte na escolla definitiva poderá facelo a través da web premiosmartincodaxdamusica.gal e un sistema de puntos. O único requisito é votar, cando menos, en cinco categorías e validar a elección. No reconto final, a opinión do público representará o 50 % do baremo, mentres que a metade restante ficará nas mans dos socios e socias de Músicas ao Vivo.

Nesta selva que Souto tanto aprecia hai oco para todos os gustos. Dende a música tradicional ata o metal, das opcións máis urbanas ás composicións orquestrais. Dende xente consolidada coma Susana Seivane ou Guadi Galego, nominadas, por certo, ata artistas emerxentes, categoría creada no 2022 que este ano ten coma finalistas a Leria, Mondra e Gloria Pavía. Sen esquecer os tres niveis Organistrum, que distinguen o labor dos proxectos de comunicación e difusión, dos festivais e das salas.

Xoán Allegue, presidente de Martín Códax, anfitrión xunto á presidenta de Músicas ao Vivo, Sheila Patricia, incidiu onte no apoio á cultura como «parte da identidade das bodegas». Un pulo no que tamén arriman o ombro a Axencia Galega das Industrias Culturais da Xunta, o Concello e a Deputación de Pontevedra. A solución, en dúas semanas, no Pazo da Cultura da cidade do Lérez.

---

---

---