Fillas de Cassandra asina a canción orixinal do filme «Soy Nevenka», «Cuando nadie ve»

Fillas de Cassandra asina Cuando nadie ve, a canción orixinal creada polo dúo especificamente para a película de Icíar Bollaín Soy Nevenka, cuxa estrea mundial tivo lugar o pasado sábado no 72.º Festival de San Sebastián. O dúo galego publicará o vindeiro mércores o seu novo sinxelo, que se poderá escoitar a partir da medianoite nas principais plataformas dixitais. Dous días antes de que a nova cinta de Bollaín chegue ás salas de cinema, o 27 de setembro.

Cuando nadie ve supón o debut cinematográfico, como autoras, de Fillas de Cassandra, ámbito no que Sara Faro e María Pérez (María Soa) deron os seus primeiros pasos coa creación da música que soou na celebración da 22.ª edición dos Premios Mestre Mateo. O compositor Xavi Font, responsable da banda sonora de Soy Nevenka, falou con Fillas de Cassandra do proxecto, unha proposta aplaudida por Bollaín, «quen contactou con nós e quen nos deu liberdade absoluta para que desenvolvésemos o noso traballo», explican Sara Faro e María Soa.

A canción naceu do estudo do guión asinado pola propia Bollaín e Isa Campo. «Foi moi impactante afondar máis aínda na historia de Nevenka, tan fiada ao universo e o relato do noso primeiro álbum, Acrópole. A gran preocupación que tiñamos durante o proceso creativo era atopar a voz, a sonoridade, as palabras e as harmonías dunha historia tan potente, mais dun xeito elegante e mesurado, sen caer na revitimización», di Fillas de Cassandra.

Cuando nadie ve incorpora uns versos en galego, nos que se fai referencia directa á negra sombra de Rosalía de Castro, «que tamén persegue a Nevenka»: «I en tódalas partes me buscas / i en todas me nombras / os flashes proxectan a forma dunha negra sombra», canta o dúo vigués, que na gravación contou coa colaboración de Cibrán Seixo no violín e de Margarida Mariño no violoncello.

---

---

---