Os primeiros premios do sector recoñecen «o valor dos proxectos e persoas que son un verdadeiro motor cultural» na comunidade
27 nov 2025 . Actualizado a las 23:00 h.Pór en primeiro plano aos profesionais da industria musical que permiten que os artistas brillen nos discos e nos escenarios. Sacar da sombra ás persoas que están detrás das carreiras dos músicos e poñer en valor todo o capital humano que fai posible que a roda musical continúe xirando. Con ese obxectivo naceron os Premios da Industria Musical de Galicia, impulsados pola Asociación Galega de Empresas Musicais (AGEM) e cuxa primeira edición se materializou onte nunha gala celebrada na Sala Capitol de Santiago, que congregou aos profesionais do sector en Galicia.
Como dixo ao inicio da noite a presentadora do evento, Tamara García Romero, non existe unha idea moi clara de que é a industria musical nin de quen a conforma: «Para min, industria musical é a fábrica onde se fan os cedés. Esa misteriosa fábrica onde custa menos facer cinco mil cedés ca mil, e menos facer mil ca cincocentos. Pero é moito máis: industria musical son ilustradores, técnicos de son, produtores, donos de salas, promotores, roadies...». Todos eles foron recoñecidos nos premios entregados.
A presidenta de AGEM, Patricia Hermida, destacou na presentación a boa etapa que atravesa a música en Galicia: «A música galega vive un momento de madurez e diversidade extraordinario. Os primeiros Premios da Industria Musical de Galicia nacen para celebralo, para agradecer o talento e o compromiso de quen fai posible o seu crecemento, e para recoñecer o valor das persoas e proxectos que converten a nosa industria nun verdadeiro motor cultural e humano para Galicia».
Para garantir a independencia e a calidade das decisións, AGEM contou cun xurado especializado composto por profesionais dos ámbitos do xornalismo musical, a divulgación, a produción, a creación artística, a sostibilidade e o emprendemento cultural. Este comité foi o responsable de propoñer as candidaturas, seleccionar os finalistas e decidir os premiados de cada categoría. A misión centrouse en identificar exemplos inspiradores dentro da industria musical galega: persoas, empresas e proxectos que contribúen ao avance do sector e representan modelos de boas prácticas profesionais. A xunta directiva de AGEM seleccionou outras dúas categorías: artista do ano (Carlos Ares) e persoa do ano (Francisco Gómez Seijo, Gandy). Finalmente, houbo un premio por votación popular, o da excelencia na experiencia do público, que recaeu no festival Surfing The Lérez.
Ao termo do acto, a presentadora fixo una reflexión: «Hoxe celebramos algo precioso: non só a música, senón a toda a xente que fai posible que exista. Os que escribides, os que gravades, os que producides, os que sobrevivides aos cables... e os que facedes que unha canción chegue a emocionarnos sen saber todo o traballo que hai detrás. Oxalá esta noite sexa a primeira de moitas, e oxalá dentro duns anos poidamos dicir: “Eu estiven na primeira”». A gala pechouse con Señora DJ.