Aos oficios relixiosos engádese a celebración gastronómica da panceta con bola, que tamén ten devotos
02 may 2019 . Actualizado a las 05:00 h.Abriuse o calendario festeiro na comarca de Deza e esta pasada fin de semana xa había onde escoller: Cristimil co San Xurxo, Cercio co Ecce Homo, Ollares co San Gregorio, Pescoso coa Festa da Xuventude, Piloño coa dos Cabaleiros de Hoy-Vas, A Bandeira coa Foliada e Lamela e Escuadro co San Marcos, eran as algunhas as ofertas anunciadas nunha fin de semana primaveral que nesta ocasión coincidiu coas eleccións xerais.
Traemos aquí a festa do San Marcos da parroquia de Escuadro (Silleda), que sen ser a festa principal da parroquia que é recoñecida pola romaría da Santa Isabel, goza de grande concorrencia e devoción, coa tradicional bendición dos froitos no transcurso da procesión que se celebra arredor do adro da fermosa igrexa parroquial. Un veciño porta unha grande pola de oliveira que logo de ser bendicida polo sacerdote oficiante é esgallada polos devotos para levar un pequeno ramallo bendito para as súas casas. Na procesión de Escuadro tamén saen a Virxe do Carme e a Purísima.
E despois dos actos relixiosos houbo sesión vermú coa charanga Ardores que tamén participou na verbena nocturna, xunto coa orquestra La Favorita. Un programa que se completou coa celebración ademais da III Festa Gastronómica da panceta con bola» que tamén ten os seus devotos e no campo da festa os da comisión repartiron torresmos de balde correndo o viño por conta dos participantes.