Adolfo Meijide: «O recoñecemento anímanos a seguir aportando calidade e seguridade»
DEZA
A cerimonia de entrega será o 20 de decembro no Ifema, en Madrid
15 nov 2022 . Actualizado a las 05:00 h.O xurado dos Premios «Las Empresas del Año 2023» galardoou á lalinense Autocares Meijide na categoría de Transporte Discrecional. A cerimonia de entrega terá lugar o día 20 de decembro, ás 19.00 horas, na Sala Retiro do recinto feiral do Ifema en Madrid nun acto patrocinado por Volvo. A asistencia será gratuíta pero é preciso acreditarse. Á firma Meijide únense os recoñecementos que recibirán nas categorías de Transporte Regular, Urbano e Pyme os operadores Sarfa, Transportes Metropolitanos de Barcelona y Autogranadina, respectivamente.
Os premios teñen como principal obxectivo poñer en valor o servizo prestado á sociedade no sector do transporte de viaxeiros por estrada no país. A revista Autobuses & Autocares está preparando un número especial sobre os gañadores, recollendo os méritos e as iniciativas postas en marcha polas firmas premiadas, caso da lalinense que comezou a súa andaina empresarial no 1924 da man do avó de Adolfo Meijide, actual xerente da empresa.
—Como se senten despois de saber deste premio?
—Contentos, orgullosos, con moita ilusión e responsabilidade polo recoñecemento que nos dan os compañeiros do transporte a nivel nacional.
—Que supón o galardón?
—É un recoñecemento que nos anima a non baixar o listón e a seguir aportando calidade e seguridade nos servizos. Agradecemento ao equipo humano que temos: aos condutores que son a parte visible, administración e mecánicos. Grazas a eles chega este premio, ao igual que a nosa fiel clientela.
—Como está o transporte discrecional na actualidade?
—Vimos dunha pandemia na que case non houbo traballo discrecional, e ábrese un momento complicado en canto a prezos pola suba dos custes, pero afrontamos o futuro con ilusión, intentando manter os clientes e esperando que se recupere o mercado asiático que nos brinda moito traballo. Coa reestruturación do transporte que fixo a Xunta logramos manter as adxudicacións que tiñamos e collemos a maiores a zona de Santiago, Ordes, Trazo, O Pino e Tordoia polo que encaramos o futuro coa intención de manter sempre a seguridade e a calidade en todos os nosos servizos. Transportamos a cotío a centos de persoas, moitos deles cativos e non precisamente por estradas nacionais senón por comarcais que son máis perigosas, de aí que insista sempre no tema da seguridade.
—A empresa foi fundada por seu avó, como está actualmente?
—Con 48 autocares e 2 VTC (vehículo de turismo con condutor), 83 traballadores con contrato fixo; apostamos pola estabilidade laboral, dos que o 62 % son mulleres e o 14 % con algunha minusvalía recoñecida. É a radiografía dunha empresa que fundou meu avó cando retornou de Cuba cos seus aforros, que seguiu impulsando logo moi ben meu pai e que eu intento modernizar.