Os Baldreus estrean un mural dedicado a Juanito, personaxe do entroido de fai anos
DEZA
Na Bandeira non faltou a vellada nin a parranda polas rúas e a nova figura da Moira, preludio do día grande de hoxe cos Altos e o concurso de disfraces
01 mar 2025 . Actualizado a las 05:00 h.As terras de Trasdeza coparon onte e o farán de novo hoxe protagonismo no Entroido da zona. En Silleda rendeuse tributo a Juanito Campa, nun Venres Sombrereiro para recuperar a un personaxe que viviu fai décadas e durante anos con especial intensidade esta festa, sendo referente do carnaval para moitos veciños. Desde SIC Iniciativas Culturais, que promoveron no 2023 a celebración do Domingo dos Baldreus, con novas figuras entroideiras, quixeron este ano render tributo a Juanito.
O cruce das rúas Trasdeza e Progreso foi o escenario escollido onte pola noite para acudir con traxes de entroido e con chapeus nese Venres Sombrereiro. Foi a presentación oficial do personaxe baseado na figura de Juanito Campa, sobranceiro desta festa en Silleda. Tamén conta xa cun mural dedicado a el, como no seu día o dos Baldreus.
Pola súa banda, na Bandeira viviuse o aperitivo do día grande. Na tarde de onte houbo cabezudos, vellos e parranda na praza Juan Salgueiro, e foi a posta de longo dunha nova figura do Entroido nesta localidade. Falamos da Moira de San Blas, que habitaba unha fonte e está asociada á lenda das parcas. Compartiu protagonismo cos nenos da Escola de Xenerais, que este ano funcionou con éxito por primeira vez. Despois chegaría a vellada polos bares e a música, con chourizos e filloas gratis para quen doase alimentos nos perecedoiros.
Hoxe o desfile comezará na Bandeira ás 16.00 horas con comparsas e carrozas encabezado polos Xenerais. Ás 18.00 farán o Alto Infantil e ás 18.30 o Atranque dos Xenerais. Haberá música e 2.200 en premios aos disfraces.
O CEIP de Forcarei replicou os seus disfraces históricos
O entroido encheu onte de festa os colexios e institutos de toda a zona. Na Estrada, no CEIP Pérez Viondi houbo un colorido desfile polo patio. No CEIP Nosa Señora das Dores de Forcarei a festa saíu á rúa. Os rapaces visitaron a escola infantil A Galiña Azul e encheron de ledicia a residencia dos maiores. Despois, desfilaron ata o Concello, onde non faltaron as fotos, o baile nin os doces propios destas datas. Estudantes e profesores vestíronse con réplicas dos disfraces mais característicos da historia do colexio, que celebra este ano o seu cincuenta aniversario. Indios, bonecos de neve, piratas, xoaniñas, robots, peliqueiros, tunos e rapaces simbolizando o día e a noite tomaron a vila.
O CPI de Rodeiro tamén promoveu onte o seu desfile polas rúas da localidade. No CEIP de Vilatuxe, en Lalín, tiveron a visita dos Cacharelos, a Entroido do barrio de A Cacharela.