Veciña de Manduas, axudou a nacer a xeracións de silledenses
26 ago 2025 . Actualizado a las 05:00 h.O Concello de Silleda continúa coa campaña (in)visibles para poñer en valor a traxectoria profesional e vital marcada polo compromiso e polo servizo público das mulleres do municipio. Neste agosto, coincidindo o vindeiro 31 co Día Internacional da Obstericia, a concellaría de Igualdade escolleu á matrona María Teresa del Carmen Rodríguez Silva coma muller homenaxeada este mes.
Nada en Manduas en 1943, Teresa descubriu a súa vocación pola medicina dende nena, cando acompañaba ao seu pa, que era médico. Tras estudar na facultade de Santiago e especializarse como matrona na Maternidad de Santa Cristina, en Madrid, iniciou a súa traxectoria profesional en Vigo, no hospital Almirante Vierna, antes de trasladarse a Silleda, onde exerceu como matrona dende 1968 ata a súa xubilación no 2008.
Da precariedade á modernidade
Durante décadas foi unha figura clave na atención ao nacemento de centos de nenos e nenas de Silleda e a súa contorna. Nos seus comezos, Teresa Rodríguez asistía aos partos nas casas particulares, en condicións moi precarias, sen luz eléctrica e con dificultades para acceder. Foi ao cabo dos anos cando puido desenvolver a súa labor no centro de saúde da vila, mellorando os medios dispoñíbeis. Cara o final da súa carreira, o seu traballo centrouse sobre todo na preparación ao parto, cando as mulleres xa acudía aos hospitais de referencia.
A rexedora, Paula Fernández Pena, e a edila de Igualdade, Ángela Troitiño, destacan que Teresa Rodríguez representa «a dedicación, entrega e vocación dunhas mulleres profesionais que foron esenciais para garantir o dereito á saúde e ao coidado das mulleres e crianzas durante décadas». Finalmente, a alcaldesa sentenzou: «Teresa axudou a nacer a moitas xeracións de silledenses».