Baixo este lema pediu o voto Feijoo nas pasadas eleccións. Visto o visto, quizais deberiamos denuncialo por publicidade enganosa. Cada paso que dá demostra que o primeiro é ser útil a Rajoy, aínda a costa de renunciar a defender os intereses de Galiza.
Os Orzamentos de Rajoy son regresivos no social e un agravio para o noso país. Un recortazo de 442 millóns de euros. Que paradoxo: pagaremos máis impostos, pero teremos menos inversións. Non é un problema de recursos, senón de prioridades: recortan un 32 % para Galiza, incrementan un 32 % o gasto militar.
A Feijoo parecíanlle insuficientes os 2.000 millóns de euros que negociaba o BNG, pero agora está contento cun recortazo que reduce esta cifra a 930 millóns. Para que nos valen deputados que venden o voto dos e das galegas por nada? As necesidades do país non se acaban co AVE. Se queremos que nos respecten e avanzar, precisamos unirnos e defender os nosos intereses. Galiza primeiro, e non como slogan baleiro, señor Feijoo.