O Concello de Carballo e a Universidade da Coruña firman un convenio para dinamizar o galego
EDUCACIÓN
O Fórum acollerá unhas xornadas a principios de xullo
29 may 2014 . Actualizado a las 20:43 h.O alcalde de Carballo, Evencio Ferrero, e o reitor da Universidade da Coruña (UDC), Xosé Luís Armesto, asinaron esta mañá na Reitoría coruñesa un convenio de colaboración para dinamizar a lingua galega cun curso de verán no que se tratará a transmisión interxeracional. O reitor, según informan dende a UDC, manifestou a súa satisfacción coa firma, que permite chegar á décima edición do curso de verán de dinamización da lingua que organiza o Servizo de Normalización Lingüística da Universidade da Coruña e que terá lugar no Fórum os días 9, 10 e 11 de xullo. O alcalde destacou o éxito de anteriores convocatorias así como doutros cursos organizados neste concello por parte da Universidade da Coruña. Así, comentou que froito dun seminario sobre urbanismo o Concello retomara unha idea moi necesaria de derrube de muros e pintado de medianeiras. Evencio Ferrero resaltou ademais o papel de «dirección intelectual da Universidade da Coruña e a súa influencia nas vilas e no conxunto da sociedade».O curso de verán que este ano tratará sobre a transmisión interxeracional do galego chega logo de nove edicións nas que se trataron propostas para a mellora do proceso de normalización da lingua. Para esta convocatoria, o Servizo de Normalización Lingüística da Universidade da Coruña que dirixe o carballés (de Cances) Xosé Ramón Freixeiro Mato, elaborou un programa que combina as sesións teóricas e as prácticas coa posta en común de experiencias, debates e análises de traballo coa fin de elaborar propostas conxuntas de intervención que melloren a transmisión da lingua ás xeracións máis novas.