Ramón Noceda: «Nós non facemos quinielas, somos realistas, alí onde nos poñan os veciños de Carnota o BNG estará defendendo o seu proxecto»

No seu día fixo caso omiso ao dito de que segundas partes nunca foron boas e volveu a ocupar a alcaldía de Carnota, e agora está por ver se o logra por terceira vez. Ramón Noceda volve pórse á fronte do proxecto do BNG co claro obxectivo de recuperar o bastón de mando que perderon hai catro anos e esperanzado en que os veciños lle devolvan a confianza que lle teñen mostrado no pasado.

—Hai catro anos renunciou a presentarse á reelección, que o impulsou a volver á primeira liña da política municipal?

—O que me levou un pouco a dar o paso foi a situación que se vive aquí, é unha cuestión case que de orgullo porque hai cousas que non poden ser e que espertan o orgullo de ser de Carnota. Tamén me moveu a esperanza de que isto cambie, e dende logo quero ser partícipe nese cambio no goberno da Galiza. Tamén houbo moitos compañeiros que me animaron a volver.

—Dálle outra perspectiva da situación e das necesidades do municipio o feito de estar estes últimos anos fóra do Concello?

—Si, ves as cousas doutra maneira e é cando sae ese orgullo de ser de Carnota ao ver que outros están gobernando e que o que fan é deixar o noso concello atrás, iso dáme tristeza. Hai cousas concretas que dan carraxe, como o feito de que levamos catro anos pagándolle o saneamento a Dumbría, iso non se pode consentir. Hai que cambiar as cousas.

—Por onde empezaría eses cambios se gaña as eleccións?

—Máis que cambiar, o que faría é retomar as cousas e proxectos que deixamos, porque nós tiñamos unha planificación, que foi a que seguiu este goberno nos últimos catro anos, fixeron o que nós deixamos previsto. Ves o seu programa e comprobas que non cumpriron con nada... É así, logo os veciños decidirán o día 28.

—Atrévese a facer unha quiniela do resultado electoral?

—Nós non facemos quinielas, somos realistas, alí onde nos poñan os veciños estaremos defendendo o noso proxecto e o programa que eles nos fixeron.

—Os veciños fixeron o programa?

—Si. Nós non sentamos nunha cadeira a deseñar un programa, fixemos asembleas e reunións e son os veciños os que nos din que é o que hai que facer. Ese é o noso compromiso con eles.

---

---