Os candidatos de Lugo expuxeron en Radio Voz os seus modelos de xestión

Radio Voz Lugo e La Voz de Galicia organizaron un debate cos catro candidatos das formacións que teñen representantes na corporación loca: Elena Candia, PP; Lara Méndez, PSOE; Rubén Arroxo, BNG, e Olga Louzao, Ciudadanos. O formato do debate, que moderou Félix Jorquera no programa Voces de Lugo, foi unha proposta de bloques temáticos, con intervencións dun minuto para cada candidato. Foron dez bloques. 

Pie de foto. Firma

El debate electoral completo de los candidatos de Lugo organizado por Radio Voz

ALBERTO LÓPEZ

1 CAL É O MODELO DE CIDADE QUE QUEREN?

—Elena Candia (PP): «Teño un modelo no que quero situar ás persoas no centro, tanto nas inversións como nos servizos, con propostas sociais e optimizando recursos e inversións útiles. Lugo merece un cambio e ofrezo a miña experiencia e formación. Quero converter ao Concello nunha Administración colaboradora».

—Lara Méndez (PSOE): «O noso modelo de cidade é apostar pola segunda transformación, onde se recuperen espazos para os cidadáns, e con políticas que busquen oportunidades laborais e atraer talento, con proxectos xa materializados. Para isto é necesario contar cun orzamento, con estabilidade e coa colaboración con outras Administracións, tendendo a man e sendo firmes para implicarse con Lugo. Nestes anos conseguimos 44,5 millóns de fondos europeos».

—Rubén Arroxo (BNG): «Desde o BNG temos tres puntos que son base. O primeiro é a comunicación, porque Lugo é das cidades máis illadas de España. Debemos reivindicar ás Administracións que completen as comunicacións. A segunda é a aposta polo espazo público e patrimonial. E o terceiro é unha política de medio ambiente, porque hai unha emerxencia climática, á que nos temos que adaptar».

—Olga Louzao (CS): «Lugo perdeu unha oportunidade histórica con eses máis de 40 millóns que en vez de resolver os problemas crónicos dos lucenses, foron para que o bigoberno competise entre eles, con improvisación, pechado á participación da cidade e á marxe da rúa. Impediu o desenvolvemento, con dous anos para dar unha licenza, cun auditorio pechado, co rural abandonado... Sabemos qué cidade hai que facer e qué pasos hai que dar». 

2 QUE PROPOSTAS TEN PARA O CASCO HISTÓRICO?

—Candia: «O PP defende un equilibrio dos barrios, pero o centro é a plataforma que nos promociona. É necesaria a rehabilitación e por iso necesitamos un ARI e un Concello dinámico e colaborador para obter licencias e que non se perdan os recursos. E propoñemos a creación do consorcio do casco histórico, que permita un plan de dinamización, ao igual que outro para a Praza de Abastos».

—Méndez: «Pois buscamos a peonalización do centro para crear unha zona de baixas emisións, como marca a lei e como os programas europeos de sostibilidade. Todo o mundo agora se suma ao cambio climático pero cando levamos a cabo practicas, manifestan rexeito. É necesario mellorar en vivendas e infraestruturas, coa dinamización económica do casco histórico e dos residentes. Tendemos a man á Xunta para que dea solucións, porque ela ten os recursos para recuperar espazos de patrimonio. Nós facémolo cos nosos recursos, como, por exemplo, a unión peonil da Praza da Constitución ou a rehabilitación do Carme».

—Arroxo: «Temos un patrimonio espectacular, dos mellores do Estado. Temos que seguir apostando polo espazo público e que sexa un reclamo. Apostamos por facer as peonalizacións, pero a Xunta debería mirar pola Tinería, que a ten abandonada. Se damos un paseo pola Muralla o que vemos é unha auténtica ruína. Reivindicaremos que se rehabilite o barrio máis antigo, porque a Xunta leva 14 anos sen facelo».

—Louzao: «Lugo ten a sorte de contar con tres patrimonios da humanidade e quere acadar o cuarto, pero se non hai colaboración entre Administracións é imposible. Levamos anos pedindo un consorcio para que aporte recursos, porque sufrimos unha epidemia de peche de negocios. E logo seguimos pendentes da revisión do Pepri, necesario para o desenvolvemento. Non se pode mirar para outro lado, facer unha peonalización improvisada, sen contar coas persoas que viven e traballan aquí. É un erro que creará consecuencias negativas. Peonalizacións si, pero non improvisadas». 

3 QUE SE FAI CO CARRIL BICI?

—Candia: «Cando alguén se equivoca debe rectificar. Fixo dano nos barrios, non se usa.., e non é por ser catastrofistas. Non se pode destinar fondos públicos para facer unha bici escola. O trazado debe se revisado e modificado, porque hai barrios onde afectou á súa economía, negocios con problemas de facturación e problemas de seguridade viaria. A mobilidade vén para quedarse, pero hai moitos espazos onde pode ir o carril bici».

—Méndez: «Temos que ir a cambios de hábitos saudables, e ir cara unha cidade sostible. Falar de sostibilidade e logo non facer nada real é incongruente. Cremos nas cidades que loitan contra o contra o cambio climático, como marcan as directrices da UE. O carril bici sei que tivo rexeite social, pero igual que o tiveron as peonalizacións. Parécemos que hai moita demagoxia, porque os fondos europeos son finalistas, e atacar isto ou ben é por descoñecemento ou coa intencionalidade de perturbar a paz social».

—Arroxo: «Nós sempre tivemos a mesma posición desde o 2015. Apostamos por un tráfico de convivencia de diferentes vehículos e por calmar o tráfico. Cando xa no 2015 defendía esta posición, o candidato do PP defendía un carril bici. Señora Candia, supoño que vostede non o sabe porque estaba en Mondoñedo».

—Louzao: «O descontento amósase cando un proxecto que en vez de crear oportunidades crea un problema. Porque non se trata só de pintar rúas verdes e vermellas e así crer que se cambian os hábitos. Temos claro que hai que revisalo porque anulou prazas de aparcamento, hai negocios que se viron afectados, e hai perigos para os usuarios. E deberíase potenciar o alugueiro de bicis e monopatíns». 

4 A ROLDA LESTE?

—Candia: «Pedimos que a Xunta acabe coa Rolda Leste, que naceu do consenso de todas as forzas. Ana Pontón tamén a pedía. Creo que se fará no consenso, cunha proposta coa que a cidadanía estea de acordo, estudando con detalle as alegacións e a protección do Rato, un paseo que leva o nome e apelidos do PP e que, por certo, leva anos con pouco coidado».

—Méndez: «É a obra do PP en cada inicio de campaña desde o 2015 e supoño que pasadas as eleccións volverana a meter nun caixón. Cremos que é unha vía necesaria para acabar co cinto da cidade, para que ese tráfico saia das zonas urbanas, pero non a toda costa. Estamos defendendo unha cidade sostible, e que ten pedidos fondos europeos, non queremos que esta estrada deteriore o patrimonio natural. E a candidata do PP fala de consenso, e nós pedimos o proxecto á Xunta, para chegar a acordos, e non nolo entregou, e si presenta un proxecto de hai 20 años, obsoleto e que incumpre a normativa».

—Arroxo: «Aquí falamos de unir dúas glorietas para reducir un traxecto de tres minutos. Merece a pena ese tempo para destruír un quilómetros de carballeiras autóctonas do Rato? Preferimos conservar unha obra natural que calquera cidade mataría por ter. Creo que hai unanimidade para conservar o Rato».

—Louzao: «Non estamos a favor deste proxecto da Xunta, gardado durante 20 anos, para avalar unha candidatura que non coñece a realidade da cidade. Custa 20 millóns e non se pode cargar o patrimonio natural. Presentamos alegacións, porque hai alternativas e queremos que se revise o trazado». 

5 QUE PLAN TEN PARA A ROLDA DA MURALLA E A AVENIDA DA CORUÑA?

—Candia: «Por alusións, faise crítica á miña persoa coa Xunta, cando nestas eleccións non se presenta, e cando se presenta aquí ten un amplo respaldo. Cada decisión de peonalización dunha vía faise con improvisación. Non parece mala idea unidireccional a avenida da Coruña e estamos dispostos a estudala, pero non de maneira illada e con absoluta falta de planificación, porque logo crea problemas, convertendo unha cidade menos cómoda».

—Méndez: «O Plan de Mobilidade xa recolle facer dunha dirección a avenida da Coruña. É un proxecto de medio e longo prazo. Para quitar tráfico, fixemos o desdobramento de Duquesa de Lugo. Fun á Xunta pedir e non tiven resposta, algo que si tiven da Deputación. Agora estamos coa segunda fase, que poderá absorber ese trafico que non vai directamente á avenida da Coruña que busca outros trazados. Na avenida da Coruña queremos facer un corredor verde, con zonas peonís anchas, para terrazas, comercio na rúa, e que sexa sostible, e humanizando a cidade».

—Arroxo: «Estamos de acordo coa unidireccionalidade da avenida da Coruña e buscamos a peonalización da parte norte da Ronda, desde San Fernando ata Bispo Odoario. Para iso, necesitamos alternativas de tráfico, como abrir a vía de conexión desde o Agro do Rolo ata a Ronda do Carme. É necesario para sacar o tráfico da zona norte, porque Camiño Real non pode absorber todo o trafico. E si, hai que ampliar as beirrarúas e dotar de zona verde á avenida da Coruña. E teño como obxectivo de futuro que a Ronda sexa toda peonil».

—Louzao: «No 2019 xa presentamos a proposta de facer unidireccional a avenida da Coruña, e para iso Infanta Elena tiña que ser máis áxil. Cremos que é un proxecto que afectará positivamente á Milagrosa. Se queremos ter unha cidade en equilibrio entre a zona norte e a sur, hai que traballar na mobilidade que beneficie á cidade». 

6 QUE QUERE FACER CO NOVO AUDITORIO E QUE POLÍTICA CULTURAL OFRECE?

—Candia: «O que hai que facer é abrilo, porque está recepcionado. A falta de mantemento dun edificio pechado é normal que conte con danos, e canto máis tardemos en abrir, máis haberá. En canto á programación cultural cremos que é un reclamo económico, pero temos uns edificios que suspenden. Queremos unha programación ambiciosa e non só para uns poucos. Que non haxa que irse á Coruña».

—Méndez: «O que queremos é abrilo. Quixeron entregarnos en 2016 un edificio sen equipamento e custaba máis de 3 millóns. Accedemos á extorsión para poder financialo, e cando nolo entregan, no 2020, hai deficiencias. Non puidemos abrilo pola falta de seguridade e sen garantías. En canto á programación, queremos buscar acordos con outras Administracións para ter espectáculos que hoxe non podemos ter. E queremos que Lugo siga sendo referente co San Froilán, o Arde Lucus e o Caudal Fest».

—Arroxo: «Lugo é unha cidade que ten unha programación exemplar. Viñeron programadores que quedaron impresionados pola axenda de actos que ofrecemos, incluído as fines de semana e os meses de verán. Apostando polas entidades locais. En breve teremos un auditorio o que haberá que encher de cultura. O problema é que a Xunta entregou un edificio co parqué levantado. Agardemos telo canto antes con programación».

—Louzao: «O auditorio hai que abrilo á marxe doutras historias entre PP e PSOE e que prexudican aos lucenses. A cultura ten que ser para todos, non só dos que lle votan ao BNG. E que nos explique Arroxo por que a banda de música segue sen actuar, Lugo precisa dun xestor cultural que dinamice todos os espazos». 

7 QUE SOLUCIÓNS TEN PARA A DEGRADACIÓN DO BARRIO DA MILAGROSA?

—Candia: «Non pode haber barrios de primeira e de segunda. A Milagrosa necesita intervención urxente, coa aprobación dun ARI, un plan de dinamización económica, para que o barrio estea habitado e reforzar a seguridade. Queremos crear unha oficina da Policía Local para atender aos afectados pola okupación. Prometeron desde o 2011 plan de rehabilitación integral. E fai falta un programa transversal con emprego e inclusión social».

—Méndez: «Estamos a traballar con proxectos para reverter un barrio que cos anos se deteriora. Négome como veciña a que se estigmatice un barrio, porque fai dano aos veciños, porque é onde eu merco, onde a miña filla vai ao cole... e non vale lanzar críticas cun fin electoral, para ter rédito político. Estamos promovendo un entorno residencial, coa fase de diagnóstico e logo buscaremos os fondos públicos e europeos. Por certo, a Xunta ten competencia en vivenda. E logo hai que potenciar a economía, o comercio e a hostalería. Defendemos un cambio lexislativo para actuar de maneira inmediata nunha okupación».

—Arroxo: «Como se recuperan os barrios? Xa o demostramos, cun plan de rehabilitación e cambiando os espazos públicos, como fixemos en Recatelo, onde se peonalizou, e agora estanse a rehabilitar as casas. E sobre a okupación, hai casos de persoas que non teñen forma de vivir e a Conselleira de Vivenda ten que actuar, porque é un dereito ter un teito onde durmir. E logo hai unha parte delictiva e de narcopisos onde ten que actuar a xustiza. As competencias son as que son».

—Louzao: «O que non se pode facer é non escoitar. Existe un problema e a solución non é facer chocolatadas na Milagrosa. Levan anos sen facer nada. É necesaria máis presenza policial, de noite e a pé. Non pidamos aos demais, miremos que podemos facer. O plan de vivendas acórdase agora porque hai moitos votos en xogo. Levamos anos falando, e vostedes en contra, e dixeron que eramos alarmistas. Ata que non fixeron unha manifestación diante da súa porta non fixeron nada e agora só porque hai eleccións». 

8 QUE MODELO DE VIVENDA SOCIAL PROPÓN?

—Candia: «O programa social ten que ser integral e transversal, con servizos sociais do Concello desde o inicio ata o final. Necesitamos máis vivenda social, programas pilotos para mozos, parellas con fillos, e Evislusa di nos seus estatutos que pode construír vivendas, requilibrando os barrios e sen estigmatizar ningún».

—Méndez: «Preocúpame escoitar que teñamos que asumir competencias impropias, pero non veñen aparelladas de orzamento. Como o plan de saúde mental. A última gardería que se fixo en Lugo a pagou Amancio Ortega, igual que a residencia de maiores, a pesar de que a Xunta ten as competencias. Temos 1.300 inscritos que demandan unha vivenda social, pero están abandonados pola Xunta».

—Arroxo: «A ultima vivenda que fixo a Xunta foi no 2008, cunha conselleira do BNG, e tiña planificado novos bloques xunto As Termas. Chegou o PP á Xunta e cero vivendas. Agora que chega campaña queren levar un bloque ao barrio con máis densidade de poboación, o Castiñeiro. O que necesitan aí son dotacións e zonas verdes. Acordamos no pleno levalas xunto ás Termas, como se preveu no 2009. Pero claro, logo falamos de okupación, pero non atallamos o problema base».

—Louzao: «Espero que non se moleste a señora Candia. Desde o 2008 non fixeron nada en vivenda pública, e no Castiñeiro, hai xa unha concentración que é unha barbaridade. Hai que esixir á Xunta que se acorde de Lugo e invista. Queremos que se amplíen axudas ao aluguer para que os que os mozos se podan independizar ou un plan que una estudantes con xente que está soa». 

9 QUE SERVIZOS PROPÓN PARA A ZONA RURAL?

—Candia: «O rural é espazo de oportunidades, con xente que aposta por sacar empresas, pero estiveron esquecidos polo bigoberno. Non destinaron nin o 2 % do orzamento, e carecen de servizos básicos de auga, saneamento, pistas deficientes, sen plan de incendios, sen fibra óptica...».

—Méndez: «Investimos 8 millóns, con case 1.000 quilómetros de vías que manter. Pedimos colaboracións e nos din que non, cando o señor Rueda se comprometeu a financiar obras cun 70-30. Para facer pouco menos dun quilómetro de saneamento fan falta tres millóns. En oito anos, Lugo entregou 11 millóns do canon e cero euros de inversións».

—Arroxo: «Vivín 15 anos nunha parroquia e sei os problemas. Non chegan servizos e vese lonxe o centro. Queremos crear un servizo de taxi á demanda para a zona rural, con prezo de bus. E difícil a nivel administrativo, pero o teremos para o vindeiro ano».

—Louzao: «As parroquias lucense levan anos demandando o saneamento e abastecemento. Hai que marcar prioridades e ver por onde hai que comezar. E esixir recursos a todas as Administracións. 

10 PETICIÓN DE VOTO

—Candia: «Lugo merece cambio, e eu ofrezo un pacto cos lucenses, que sexa unha realidade, con mais servizos e unha administración colaboradora. Que un veciño entre cun problema e reciban unha solución. Non despilfarrar en proxectos que non teñen utilidade e se centre na xente. Asumimos o compromiso dun Lugo para todos, con dialogo e consenso e apartando a confrontación, con traballo eficiente e visión útil da política para mellorar a vida da xente».

—Méndez: «A segunda gran transformación que vive Lugo é imparable, e se non seguimos, pode parar. O visualizamos nestes oitos anos, con prestixio internacional, con oportunidades laborais para a cidade, que ninguén se vexa expulsado da cidade e para ter ingresos e facer esa redistribución e fomentar a zona urbana e rural e sen deixar a ninguén atrás».

—Arroxo: «Onde gobernamos, somos referentes internacionais e transformamos os espazos. Lugo puido ver como goberna o BNG, co 95 % do noso programa executado. Durante catro anos daremos un paso adiante».

—Louzao: «Lugo non pode seguir sendo o vagón de cola, os prexudicados do PSOE, PP e BNG. Hai que poñer en valor o que temos, ofrecendo unha cidade cómoda e segura, que dea solucións e que non supoña un calvario burocrático».

---

---

---