Juan Manuel Saborido: «Nun só mandato non se pode mudar unha realidade de 40 anos en Carnota»

Juan Manuel Saborido, candidato do PSOE de Carnota e aspirante á reelección como alcalde do municipio, ten clara a liña que debe seguir o futuro goberno local, que el espera encabezar de novo para dar continuidade ás políticas desenvolvidas no mandato que está a piques de finalizar.

—Como resumiría o programa electoral do PSOE?

—Nós temos proxectos realistas para Carnota, agora non necesitamos gaiases nin grandes obras para o recordo. Temos que seguir avanzando nas políticas que viñemos desenvolvendo ata o de agora.

—Cales son esas políticas?

—Principalmente as políticas sociais. En só seis meses desde que chegamos conseguimos darlle a volta aos servizos sociais e temos que seguir nesa liña, con máis prestacións para os maiores, máis políticas de conciliación e servizos a actividades para a rapazada.

—Hai algún proxecto concreto neste eido?

—É moito aventurar falar de proxectos moi concretos porque non sempre dependen do Concello nin da vontade que teñamos para levalos a cabo, pero si temos algún, como adherirnos ao programa piloto do novo modelo de residencias da terceira idade que vén de poñer en marcha a Deputación da Coruña.

—Que outros ámbitos destacan no seu programa?

—A loita contra o lume é outro piar fundamental e queremos renovar o convenio con Medio Rural para o mantemento das franxas de protección. Tamén afondaremos no emprego adheríndonos aos diferentes plans da Deputación para a contratación de brigadas de obras e limpeza de praias, por exemplo. Este tipo de programas dan bos resultados e permiten crear entre 20 e 30 postos de traballo. E tamén en colaboración co goberno provincial, a través dos plans de obras, seguiremos avanzando no saneamento e abastecemento de auga. Iso é o que realmente lle preocupa á veciñanza, xa se fixo moito, pero queda aínda moito máis.

—Polo que di, a colaboración con outras Administracións é crucial para un Concello como o de Carnota.

—Cremos que o diálogo e a cordialidade con outras Administracións é moi importante para Carnota e ata o de agora non había esa relación. E tamén o é a colaboración con todo tipo de entidades e asociacións do noso concello, e coas empresas, coas grandes, coas que temos unha relación moi estreita, e tamén coas pequenas. Por exemplo, o turismo é a ferramenta máis potente que temos para xerar emprego e asentar poboación e temos que favorecer un turismo sostible no noso concello.

—Que lle está a transmitir a veciñanza nestes días de campaña? Cre que valora o traballo feito?

—A lectura que eu saco é que a xente valora o esforzo que fixemos e é consciente das enormes dificultades que tivemos para sacar cousas adiante, e aínda así fixemos o que puidemos. Nun só mandato non se pode cambiar unha realidade de 40 anos.

---

---